ޕާކިސްތާނުން ވަނީ ޓެރަރިޒަމާ ދެކޮޅަށް ޙަރަކާތްތެރި ވުމަށް، ޖޫން 22 ގައި އޮޕަރޭޝަން އަޒްމޭ އިސްތިޙުކާމް އިޢުލާން ކޮށްފައެވެ. އެކަމކުވެސް، ބޯޑަރު ޕްރޮވިންސްތައް ކަމަށްވާ، ބަލޫޗިސްތާން އަދި ޚައިބަރު ޕަޚްތުންޚްވާ ގައި ގާތްގަނޑަކަށް ކޮންމެ ދުވަހަކު ވެސް ޓެރަރިޒަމްގެ ޙަމަލަތަކާ ދަނީ ކުރިމަތި ލަމުންނެވެ.
ޕާކިސްތާނުގެ އަސްކަރީ މުއައްސަސާތަކާއި ފެޑެރަލް ސަރުކާރު ވެސް ވަނީ ސަލާމަތީ ހާލަތު އެއް ދަރަޖަ މަތިކޮށްފައެވެ. އަދި އެއާއެކު ކޮންމެ ހިސާބެއްގައިވެސް ބައި މަދު މީހުންނަށް އިތުރު އުދަގޫތަކާ ކުރިމަތިލާން ޖެހިފައި ވެއެވެ.
ރަސްމީ ހިސާބުތަކަށް ބަލާއިރު އޮކްޓޯބަރު މަހު ގާތްގަނޑަކަށް 200 ޓެރަރިސްޓް ހާދިސާ ރެކޯޑްކޮށްފައި ވެއެވެ. އޭގެ ބޮޑު ބައެއް ރެކޯޑްކޮށްފައިވަނީ ޚައިބަރު ޕަޚުތޫންޚުވާގައިއާއި ބަލޫޗިސްތާންގަ އެވެ.
ޕާކިސްތާނުން އަޅާ ސަލާމަތީ ފިޔަވަޅުތައް ނާކާމިޔާބުވެފައިވާ ކަމަށް ބަލައިގެން ޗައިނާއިން ދަނީ ދެފަރާތް ގުޅިގެން ޖޮއިންޓް ސެކިއުރިޓީ ޔުނިޓުތައް ހެދުމަށް ބާރު އަޅަމުންނެވެ.
ޗައިނާގެ ޕްރެޝަރާއި އަދި އެފަދަ ޔުނިޓެއް ގާއިމް ކޮށްފިނަމަ، ޓެރަރިޒަމްގެ އިތުރު ނުތަނަވަސްކަމެއް ކުރިމަތިވެދާނެ ކަމަށް ތަޖުރިބާކާރުން ގަބޫލުކުރެ އެވެ.
މި ހާލަތުގައި ޕާކިސްތާނުގެ ސަލާމަތި އިދާރާތަކަށް ތުހުމަތު ކުރެވެނީ، ޚައިބަރާއި ބަލޫޗިސްތާނުގެ ގަބީލާ ސަރަހައްދުތަކުގައި ބަލޫޗް އަދި ޕަޝްތޫން ޒުވާނުން ގަދަކަމުން ގެއްލުވާލާ ކަމަށެވެ. އޭގެ އިތުރުން ބަލޫޗީ އަދި ޕުޝްތޫ އެކްޓިވިސްޓުންނާ ދެކޮޅަށް ސަރުކާރުން ދަނީ ދައުވާތައްވެސް ކުރަމުންނެވެ.
ސަލާމަތީ ހާލަތު ގޯސްވުމާއެކު ޕާކިސްތާން ޗައިނާގެ އިގްތިސާދީ ގުޅުމާއި މަޝްރޫޢުތައް ކުރިއަށް ގެންދިއުމަށް ހުރަސްތައް ކުރިމަތި ވެފައި ވެއެވެ.
މިދިޔަ ސެޕްޓެމްބަރު މަހު މުޅި ޕާކިސްތާނުގައި ހަނގުރާމަވެރިން 77 ހަމަލާ ދީފައިވެއެވެ. އަދި އެހަމަލާތަކުގައި 77 މީހުން ވަނީ މަރުވެފައެވެ. އޭގެ ތެރޭގައި ސަލާމަތީ ފަރާތްތަކުގެ 38 މުވައްޒަފުންނާއި އާންމުންގެ 23 މީހުންނާއި ހަނގުރާމަވެރިންގެ 16 މީހުން ހިމެނެ އެވެ.
މީގެ އިތުރުން 132 މީހަކަށް އަނިޔާވެފައިވާއިރު އޭގެ ތެރޭގައި އާންމުންގެ 78 މީހުންނާއި ސެކިއުރިޓީ 54 މީހުންވެސް ހިމެނެއެވެ.
އިސްލާމްއާބާދުގައި ހުންނަ ތިންކް ޓެންކެއް ކަމަށްވާ ޕާކިސްތާން އިންސްޓިޓިއުޓް ފޯ ކޮންފްލިކްޓް އެންޑް ސެކިއުރިޓީ ސްޓަޑީޒް (ޕީއައިސީއެސްއެސް) އިން ދައްކާ ގޮތުގައި އޮކްޓޯބަރު މަހު ހަނގުރާމަވެރިންގެ ހަމަލާތައް 12 ޕަސެންޓް މަދުވި ނަމަވެސް ސެޕްޓެމްބަރު މަހާ އަޅާބަލާއިރު ޖުމްލަ މަރުވި މީހުންގެ އަދަދު ވަނީ 77 ޕަސެންޓް އިތުރުވެފަ އެވެ.
ހަނގުރާމަވެރިންގެ ޖުމްލަ ހަމަލާތަކުގެ އަދަދު ކުޑަކޮށް މަދުވި ނަމަވެސް، އޮކްޓޯބަރު މަހަކީ އަހަރުގެ ތެރޭގައި ދެވަނައަށް އެންމެ ގިނައިން މީހުން މަރުވި މަހެވެ.
އޮގަސްޓް މަހަށް ފަހު މިފަދަ ހާދިސާތަކުގައި 254 މީހުން މަރުވެ 150 މީހުން ޒަޚަމްވެފައިވެއެވެ.
ސެންޓަރ ފޯ ރިސާޗް އެންޑް ސެކިއުރިޓީ ސްޓަޑީޒް (ސީއާރުއެސްއެސް) ގެ ތަފާސް ހިސާބުތަކަށް ބަލާއިރު، 2024 ވަނަ އަހަރުގެ ތިން ވަނަ ކުއާޓަރުގައި ޓެރަރިސްޓް އަނިޔާވެރިކަމާއި ޓެރަރިޒަމްއާ ދެކޮޅަށް ހިންގާ ކެމްޕޭންތަކުގައި މަރުވާ މީހުންގެ އަދަދު ގާތްގަނޑަކަށް 147 ޕަސެންޓް އިތުރުވެ، އަނިޔާވެރިކަން 90 ޕަސެންޓަށް އިތުރުވެފައި ވެއެވެ.
