ދޮގު މައުލޫމާތު ދީގެން ރަޝިޔާއަށް ވަދެ، ޖާސޫސު ކުރާ ކަމަށް ތުހުމަތު ކުރެވޭ އިނގިރޭސި ޑިޕްލޮމެޓަކު ރަޝިޔާއިން ބޭރުކޮށްލައިފިއެވެ.
ރަޝިޔާގެ ޖާސޫސީ ޚިދުމަތާ ހަވާލާދީ ރަޝިޔާގެ ނޫސް އެޖެންސީތަކުން ރިޕޯޓްކޮށްފައިވާ ގޮތުގައި "މި ޑިޕްލޮމެޓް ހިންގާ ޖާސޫސީ ހަރަކާތްތަކާއި ފަސާދަ ކުރަނިވި ހަރަކާތްތަކުގެ ނިޝާންތައް ސާފުކޮށް ފެނިފައިވާ" ކަމަށެވެ.
ރަޝިޔާގެ ފޮރިން މިނިސްޓްރީގެ ތަރުޖަމާނު މާރިއާ ޒަކަރޯވާ ވިދާޅުވީ، މިމައްސަލާގައި މަޝްވަރާ ކުރުމަށް އިނގިރޭސި ސަފީރު ނައިޖަލް ކޭސީ މިނިސްޓްރީއަށް ހާޒިރުކޮށްފައިވާ ކަމަށެވެ.
މިދިޔަ އޮގަސްޓް މަހު ވެސް ރަޝިޔާގައި ޖާސޫސް ކުރުމުގެ ތުހުމަތުގައި އިނގިރޭސި ހަ ޑިޕްލޮމެޓަކު ވަނީ ބޭރުކޮށްފައެވެ.
މިކަމާ ގުޅިގެން އިނގިރޭސި ފޮރިން އޮފީހުގެ އެއްވެސް ބަހެއް އަދި ލިބިފައި ނުވެއެވެ. މޮސްކޯގައި ހުންނަ އިނގިރޭސި އެމްބަސީން ވެސް އެއްވެސް ތަފްސީލެއް ދީފައި ނުވާ ކަމަށް މިޑިއާ ރިޕޯޓުތައް ބުނެއެވެ.
