އެމެރިކާ، އޮސްޓްރޭލިއާ އަދި ޖަޕާނުން ވަނީ ޗައިނާއިން ތައިވާން ސަރަހައދާ ދިމާއަށް އަމާޒުކޮށް ބެލިސްޓިކް މިސައިލް އުދުއްސާލުން ކުށްވެރިކޮށް، ޗައިނާއިން ތައިވާން ކަނޑުއޮޅީގައި ހިންގާ އަސްކަރީ ތަމްރީނުތައް ވަގުތުން ހުއްޓާލުމަށް ބެއިޖިންގއަށް ގޮވާލާފައެވެ.ޓައިވާން ސްޓްރެއިޓްގައި ނުތަނަވަސްކަން އިތުރުވެގެން ދިޔައީ، އެމެރިކާގެ ހައުސްގެ ސްޕީކަރ ނެންސީ ޕެލޯސީ ޓައިވާނަށް ކުރެއްވި ދަތުރުފުޅާ ގުޅިގެންނެވެ. ޗައިނާއިން ދަނީ އެގައުމުގެ އަސްކަރީ ހަރަކާތްތައް އިތުރުކޮށް، ޓައިވާނާއި ޗައިނާއާ ދެމެދު ކަނޑައަޅާފައިވާ މީގެ ކުރިން ޗައިނާގެ އުޅަނދުތައް ހުރަސް ނުކުރާ ލައިން ވެސް ހުރަސްކޮށްފައެވެ.ޓައިވާން ސްޓްރެއިޓް ގެ ވަށައިގެން ޗައިނާގެ ގިނަ މަތިންދާ ބޯޓްތަކާއި މަނަވަރުތައް މިއަދުވެސް ފެނިފައިވެއެވެ.
މި ތަމްރީންތަކުގައި ޗައިނާއިން ދަނީ ޓައިވާނަށް އަރަގަންނާނެ ގޮތުގެ ތަމްރީނުތަކެއް ރާވައި ހިންގަމުންނެވެ.
ޓައިވާންގެ ދިފާއީ ވުޒާރާއިން ބުނީ އެގައުމުގެ ސިފައިން މިފަދަ ހާލަތަކަށް އިޖާބަދިނީ ސަވައިލެންސް ސިސްޓަމްތަކާއި، މަތިންދާ ބޯޓްތަކާއި، ކަނޑުގެ އަސްކަރީ އުޅަނދުތަކާއި، މިސައިލް ސިސްޓަމްތައް ތައްޔާރުކޮށްގެން ކަމަށެވެ.ހުކުރު ދުވަހު ޓައިވާންގެ ދިފާއީ ވުޒާރާއިން ބުނީ ޑްރިލްތަކުގައި ބައިވެރިވުމަށް ޗައިނާގެ 68 ހަނގުރާމަ މަތީ މަތިންދާ ބޯޓާއި 13 މަނަވަރު ޓައިވާންގެ ސަރަހައްދު ތެރޭން ދަތުރުކޮށްފައިވާ ކަމަށެވެ.
