އިންސާނީ ހައްގުތަކަށް ވަކާލާތު ކުރާ ހިއުމަން ރައިޓްސް ވޮޗްއިން ބުނަނީ އަފްޣާނިސްތާންގައި ސައްހަ އިގުތިސޯދީ ހަރަކާތްތަކާއި އިންސާނީ އެހީ ފޯރުކޮށްދިނުމަށް މަގުފަހިކުރުމުގެ ގޮތުން އެމެރިކާ އާއި އެހެން ސަރުކާރުތަކުން އެ ގައުމުގެ ބޭންކިން ސެކްޓާއަށް އަޅާފައިވާ ދަތިކުރުމުގެ ފިޔަވަޅުތަކަށް ލުއި ނުދޭހާ ހިނދަކު އަފްޣާނިސްތާނުގެ އިންސާނީ ކާރިސާއަށް އެދެވޭ ހައްލެއް ނުހޯދޭނެ ކަމަށެވެ.ހިއުމަން ރައިޓްސް ވޮޗްގެ އޭޝިއާ އެޑްވޮކަސީ ޑިރެކްޓަރު ޖޯން ސިފްޓަން ވިދާޅުވީ، އަފްޣާނިސްތާނުގައި ބަނޑުހައި ހޫނުކަމާއި ސިއްހީ ކާރިސާ އިންތިހާއަށް އިތުރުވަމުން އަންނަ ކަމަށެވެ. އަދި މިދަނޑިވަޅުގައި، އެކަމުގެ ހައްލެއް އަންނާން އޮތީ ބޭންކިން ގެ ދާއިރާ ކާރިސާއަކުން ސަލާމަތް ކުރެވިގެންނެވެ.
"ބޭރު ޤައުމުތަކުގެ ސަރުކާރުތަކާ ޠާލިބާނާ ދެކޮޅަށް އަޅާފައިވާ ބައިނަލްއަޤުވާމީ އިޤުތިޞާދީ ދަތިކުރުމުގެ ފިޔަވަޅުތަކުގެ ސަބަބުން އަދިވެސް އެ ޤައުމުގެ ކާރިޘާ ބޮޑުވަމުން، އަފްޣާނިސްތާނުގެ ރައްޔިތުންނަށް ދަނީ ބޮޑެތި ގެއްލުންތައް ވަމުން." ހިއުމަންރައިޓްސް ވޮޗްއިން ބުންޏެވެ.އަފްޣާނިސްތާނުގެ މަރުކަޒީ ބޭންކަށް ބޭރު ފައިސާގެ ރިޒާވް ނުވަތަ ބައިނަލްއަގްވާމީ ގިނަ މުއާމަލާތްތައް ލިބުމަށް އަދިވެސް ހުރަސްތަކެއް އެޅިފައި ވެއެވެ. ނަތީޖާއެއްގެ ގޮތުން ލިކުއިޑިޓީގެ ބޮޑު ކާރިސާއަކާއި ފައިސާގެ ނޫޓުތައް ނެތުމުގެ މައްސަލަ އެ ގައުމަށް އަދިވެސް ކުރިމަތިވެފައިވެއެވެ.ވިޔަފާރިތަކާއި، ހިއުމެނިޓޭރިއަން ގްރޫޕްތަކާއި، އަމިއްލަ ބޭންކުތަކުން އަދިވެސް ބުނަމުން ދަނީ އެ ފަރާތްތަކުގެ އޮޕަރޭޝަނަލް ކެޕޭސިޓީއަށް ބޮޑެތި ދަތިކުރުމުގެ ފިޔަވަޅުތަކެއް އަޅާފައިވާކަމަށެވެ.
ހަމަ އެއާއިއެކު، އަފްޣާނިސްތާނުގެ ސިއްހީ، ތައުލީމީ އަދި އެނޫންވެސް ޒަރޫރީ ދާއިރާތަކަށް އެހީތެރިވުމަށް ބޭރުގެ އެހީދޭ ފަރާތްތަކުން ދޭ ފައިސާ ވެސް ވަނީ ވަރަށް ބޮޑަށް އުނިކޮށްފައެވެ.
މި ދަނޑިވަޅުގައި އަފްޣާނިސްތާނުގެ އެތައް މިލިއަން ރައްޔިތުންގެ އާމްދަނީ ގެއްލިފައިވާ ކަންވެސް ހިއުމަން ރައިޓްސް ރައިޓްސް ގްރޫޕުން ފާހަގަ ކުރިއެވެ.
ކާބޯތަކެއްޗާއި އަސާސީ ސާމާނު މުޅި އަފްޣާނިސްތާނުގެ ބާޒާރުތަކުން ލިބެން ހުރި ނަމަވެސް، މުޅި އަފްޣާނިސްތާނުގައި ބަނޑުޖހައި ނޫހުކަމެއް އަށަގެންފައިވާ ކަމަށް ބުނެފައި ވެއެވެ.
