އަފްޣާނިސްތާނުގެ ވެރިރަށް ކާބުލްގައި ހުކުރު ދުވަހު އަތްގާޑިއަލެއްގައި ހަރުކޮށްފައި ބޮމެއް ގޮއްވާލުމުން އަފްޣާނިސްތާނުގެ ޝިޔައީން ދިރިއުޅޭ ސަރަހައްދެއްގައި އާންމުންގެ 8 މީހުން މަރުވެއްޖެ ކަމަށް އޮފިޝަލުން ވިދާޅުވެއެވެ.
އަފްޣާނިސްތާނުގެ ޝިޔައީ ކޮމިއުނިޓީ މެމްބަރުން މުހައްރަމްގެ ހަނދާނުގައި ބޭއްވި އެއްވުމެއްގައިވެސް ބޮން ގޮއްވާލައިގެން 18 މީހުން ޒަޚަމްވެފައިވާ ކަމަށް ފުލުހުންގެ ތަރުޖަމާނު ޚާލިދު ޒަދްރާން ވިދާޅުވިއެވެ.
ޒަދްރާން ވިދާޅުވީ، ބޮން ގޮއްވާލާފައިވަނީ ތަރުކާރީއިން ފުރިފައިވާ އަތްގާޑިއަލެއްގައި ބޮން ހަރުކޮށްގެން ދުވާލު ގަޑީގައި ކާބޯތަކެތި ގަންނަ މީހުން ހެލިފެލިވާ ސަރަހައްދެއްގައި ކަމަށެވެ. ބޮން ގޮއްވާލާފައިވާ އަވަށްތަކުގައި މައިގަނޑު ގޮތެއްގައި މީހުން ދިރިއުޅެމުންދަނީ ޝިޔައީ ހަޒާރާ ދަރިކޮޅުގެ މީހުން ކަމަށް ވެއެވެ.
ސަރުކާރުގެ ތަރުޖަމާނު ޒަބީހުالله މުޖާހިދު ވަނީ މި ހާދިސާގައި މަރުވި މީހުންގެ އަދަދު ކަށަވަރުކޮށްދެއްވައި، ބޮމުގެ ހަމަލާއަކީ "އިސްލާމް ދީނާއި ގައުމުގެ ދުޝްމަނުންގެ މަސައްކަތެއް" ކަމަށް ވިދާޅުވެފައެވެ.
ބޮން ގޮއްވާލި ކަމަށް ތުހުމަތު ކުރަނީ ހަނގުރާމަވެރި އިސްލާމިކް ސްޓޭޓް ޖަމާއަތުންނެވެ.
އެ ޖަމާއަތުގެ ޓެލެގްރާމް ޗެނަލެއްގައި ބުނެފައި ވަނީ އައިއެސްގެ ހަނގުރާމަވެރިން "ބޮން ގޮއްވާލީ" ކަމަށެވެ.
