ޕާކިސްތާން ތަހްރީކޭ އިންސާފު ޕާޓީއާއި ސިފައިންނާ ދެމެދު ގުޅުން ދަނީ ކުރިން ހީނަރުވެފައި ނުވާ މިންވަރަށް ހީނަރު ވަމުންނެވެ. ޕީޓީއައިގެ ސޯޝަލް މީޑިއާއިން ވަނީ ސިފައިންގެ ހެލިކޮޕްޓަރު ވެއްޓުނު ހާދިސާއާ ގުޅިގެން ވަރަށް ނާތަހުޒީބު ކެމްޕޭނެއް ވެސް ހިންގާފައެވެ. މި ހާދިސާގައި ސިފައިންގެ އިސް އޮފިސަރުންގެ ހަ މީހަކު ޝަހީދުވިކަމަށް ސިފައިން ބުނެފައި ވެއެވެ.
ޕީޓީއައިގެ ފަރާތްތަކުން ބުނާ ގޮތުގައި ޕީޓީއައިގެ ބައެއް އެކައުންޓުތަކުން މި ބީޓްގެ ހާދިސާއާ ގުޅިގެން ކޮށްފައިވާ ބައެއް ޓުއީޓްތައް ސިފައިން ވަނީ ޕާޓީގެ އެންމެ އިސް ފަރާތްތަކާ ޙިއްސާކޮށްފައެވެ.
އޭގެ ސަބަބުން ޕީޓީއައި ލީޑާޝިޕުން ވަނީ ޕާޓީގެ ރަސްމީ ޓްވިޓާ ހޭންޑްލް މެދުވެރިކޮށް، ސިފައިން މައްސަލަ ޖެއްސި އެކައުންޓްތަކަކީ ޕީޓީއައިގެ ރަސްމީ ޓީމާ އެއްވެސް ގުޅުމެއް ހުރި އެކައުންޓްތަކެއް ނޫން ކަމަށް ބުނެފައެވެ. އަދި އއީ، ނަފްރަތު އުފައްދާ އެކައުންޓްތަކެއް ކަމަށާއި އެފަދަ އެކައުންޓްތަކާ މެދު ޒީރޯ ޓޮލަރެންސް ގެންގުޅޭ ކަމަށް ބުނެފައެވެ.
އެހެންނަމަވެސް ބައެއް އެކައުންޓް ގެންގުޅޭ މީހުންނަކީ ޕީޓީއައި ގެ ފޮލޯވަރުން ކަމަށް ބެލެވޭއިރު، އެމީހުން ދަނީ ސިފައިންނާ ދެކޮޅަށް ޓުއީތްތައް ކުރަމުންނެވެ.
