ކޮލަމްބޯގައި ހުންނަ ޗައިނާގެ އެމްބަސީން ވަނީ ސްރީލަންކާގެ އިދާރާތަކާ އެކު ކުއްލި ބައްދަލުވުމެއް ބާއްވަން އެދިފައެވެ. މި ބައްދަލުވުމަކީ، އިންޑިއާގެ ކަންބޮޑުވުންތައް ނިއުދިންލީން ފާޅު ކުރުމަށް ފަހު ޗައިނާގެ ޖާސޫސީ މަނަވަަރު ހަމްބަންޓޯޓާ ބަނދަރަށް އައުން ލަސްކުރުމަށް ކޮޅުނބުން އެދުމާ ގުޅިގެން ބާއްވަން އެދުނު ބައްދަލުވުމެކެވެ.
ޗައިނާގެ ސްޕޭސް އެންޑް ސެޓެލައިޓް ޓްރެކިން ރިސާޗް އުޅަނދު "ޔުއާން ވަންގް 5" ހަމްބަންޓޯޓާ ބަނދަރަށް ބަނދަރު ކުރަން ހަމަޖެހިފައި އޮތީ، ފާއިތުވީ އެތައް އަހަރެއްގެ ތެރޭގައި އެ ގައުމަށް ކުރިމަތިވި އެންމެ ބޮޑު އިގުތިސޯދީ ކާރިސާއާ ގުޅިގެން ދިމާވެފައިވާ ހަލަބޮލިކަމުގެ ތެރޭގައެވެ.
ސްރީލަންކާގެ ފޮރިން މިނިސްޓްރީން ކޮލަމްބޯގައި ހުންނަ ޗައިނާ އެމްބަސީއަށް ފޮނުވި 'ތާޑް ޕާސަން' ނޯޓެއްގައި ބުނެފައިވަނީ، ހަމްބަންޓޯޓާއަށް "ޔުއާން ވަންގް 5" ބޯޓު އައުން ފަސްކޮށްދިނުމަށް އެ މިނިސްޓްރީން އެދޭ ކަމަށެވެ.
ކޮލަމްބޯގައި ހުންނަ ޗައިނާ އެމްބަސީން ލަންކާގެ އިދާރާތަކާ އެކު އަވަސް ބައްދަލުވުމެއް ބާއްވަން އެދުނީ އެ ދަތުރުފުޅު ފަސްކޮށްދިނުމަށް އެދި ފޮރިން މިނިސްޓްރީއަށް އެ ނޯޓު ލިބުމުން ކަމަށް ކޮލަމްބޯގެ މަސްދަރުތަކުން ބުނެ އެވެ.
ސްރީލަންކާގެ ބައެއް ނިއުސް ޕޯޓަލްތަކުންވެސް ރިޕޯޓްކޮށްފައިވާ ގޮތުގައި، ސްރީލަންކާގެ ރައީސް ރަނިލް ވިކްރަމަސިންހަވެސް ވަނީ ޗައިނާގެ އެމްބަސެޑަރ ކީ ޒެންހޮންގްއާއެކު ސިއްރު ބައްދަލުވުމެއް ބާއްވަވާފައެވެ. ނަމަވެސް އެ ބައްދަލުވުމާ ގުޅިގެން ދެކެވުނު ވާހަކަތައް ލަންކާ ރައީސް އޮފީހުން ވަނީ ދޮގުކޮށްފައެވެ.
ސްރީލަންކާގެ ސިޔާސީ މަސްރަހު ހަލަބޮލިވެފައިވާ މި ދަނޑިވަޅުގައި، ހަމްބަންޓޯޓާ ބަނދަރަށް ޗައިނާގެ ޖާސޫސީ މަނަވަރު ވަނުމުގެ ހުއްދަ އޭރުގެ ސަރުކާރުން ވަނީ ދީފައެވެ.
ޗައިނާގެ މި ބޯޓު ސްރީލަންކާގެ ބަނދަރަށް ބަނދަރުކުރާނެ ކަމަށް ލަފާކޮށްފައިވަނީ ތެޔޮ އެޅުމަށެވެ. މި ބޯޓުން އޮގަސްޓް މަހުން ސެޕްޓެމްބަރު މަހާ ހަމައަށް އިންޑިއާ ކަނޑުގެ ހުޅަނގު އުތުރު ސަރަހައްދުގައި ސެޓެލައިޓް ކޮންޓްރޯލް އަދި ރިސާޗް ޓްރެކިންގެ މަސައްކަތް ކުރާނެ ކަމަށް ޗައިނާގެ ޖައްވީ އިދާރާއިން ވަނީ ބުނެފައެވެ.
ހަމްބަންޓޯޓާގެ ދެކުނު ކަނޑުގެ ބަނދަރަކީ ސްޓްރެޓެޖިކު މުހިންމު ތަނެއްގައި އޮންނަ ބަނދަރެކެވެ. ނަމަވެސް މިއީ ފަޅަށް އޮންނަ ބަނދަރެކެވެ.
ރާޖަޕަކްސަ އާއިލާގެ އުފަން ރަށުގައި އޮންނަ މި ބަނދަރަކީ ޗައިނާގެ ބޮޑު ލޯނުތަކެއް ނަގައިގެން ތަރައްގީކޮށްފައިވާ ބަނދަރެކެވެ.
