އެމެރިކާގެ ހައުސް ސްޕީކަރ ނެންސީ ޕެލޯސީ ޓައިޕޭއަށް ކުރެއްވި ދަތުރުފުޅާ ގުޅިގެން ޓައިވާނަށް ޗައިނާގެ ސިފައިން ދެމުންދާ އިންޒާރު ދުނިޔޭގެ ޕާލަމެންޓްތަކުގެ މެމްބަރުންގެ ގްރޫޕަކުން ވަރަށް ބޮޑަށް ކުށްވެރިކޮށްފިއެވެ.
ޑިމޮކްރެޓިކް ގައުމުތަކުގެ ޕާލަމެންޓް މެމްބަރުންގެ މައްޗަށް އެކުލެވޭ ކްރޮސް ޕާޓީ އެލަޔަންސްއެއް ކަމަށްވާ އައިޕީއޭސީއިން ނެރުނު ބަޔާނެއްގައި ބުނެފައިވަނީ، ޓައިވާނަށްދޭ އަސްކަރީ އިންޒާރުތައް މިފަހަކަށް އައިސް އިތުރުކުރަމުންދާތީ، އިންޓަރ ޕާލަމެންޓްރީ އެލަޔަންސް އޮން ޗައިނާ (އައި.ޕީ.އޭ.ސީ)އިން އެކަމާ ވަރަށް ބޮޑަށް ކަންބޮޑުވުން ފާޅުކުރާ ކަމަށެވެ.ޗައިނާގެ ސިފައިން ވަނީ ޓައިވާން ސްޓްރެއިޓް ހުރަސްކޮށް ލައިވް ފަޔަރ އެކްސަސައިޒްތައް ބާއްވައި، މީޑިއަން ލައިން ހުރަސްކޮށް ހަނގުރާމަމަތީ މަތިންދާ ބޯޓުތައް މެދު ނުކެނޑި ފޮނުވައި، އަދި ފުރަތަމަ ފަހަރަށް ޓައިވާންގެ މަތިން ބެލިސްޓިކް މިސައިލް އުދުއްސާލައި، ޖަޕާނުގެ އެކްސްކްލޫސިވް އިކޮނޮމިކް ޒޯނަށް އަމާޒުކޮށް މިސައިލް ފޮނުވާލުން ފަދަ ކަންކަން ކޮށްފައެވެ. އައިޕެކުން ބުނެފައި ވަނީ މި އަމަލުތަކަކީ ޒިންމާދާރުކަން ކުޑަ އަދި ނުރައްކާތެރި އަމަލުތަކެއ ކަމަށާއި، މިއީ ހަމައެކަނި އަސްކަރީ ބާރު ދެއްކުމެއް ނޫންކަމަށާއި މިއީ ޓައިވާނާއި އެގައުމުގެ ސަރަހައްދީ ބައިވެރިންނާ ދެކޮޅަށް އިގުތިސޯދީ ގޮތުން ކުރުނީސް ކުރުވުމުގެ އަމަލެއްކަމަށެވެ.
އައިޕެކްއިން ބުނީ، ޑިމޮކްރެޓިކް ގައުމުތަކުން ޗައިނާގެ އަސްކަރީ ހަރަކާތްތައް ވަގުތުން ހުއްޓާލުމަށް ޗައިނާގެ ސަރުކާރަށް ގޮވާލާ ކަމަށެވެ. އަދި ޓައިވާން ސްޓްރެއިޓް މެދުވެރިކޮށް ބައިނަލްއަގުވާމީ ވިޔަފާރީގެ މަގުތައް އަލުން ހުޅުވުމަށް ގޮވާލާ ކަމަށެވެ.
