ޣައްޒާގައި އިސްރާއީލާއި ފަލަސްޠީނުގެ ހަނގުރާމަވެރިންނާ ދެމެދު ހަނގުރާމަ ހުއްޓާލުމަށް އދ.ގެ އިތުރުން މިޞްރުން ކުރަމުންދާ ޑިޕްލޮމެޓިކް މަސައްކަތްތަކަށް އިންޑިއާއިން ތާއީދުކޮށް، އިންޑިއާއިން ހުރިހާ ފަރާތްތަކަށްވެސް ގޮވާލާފައި ވަނީ މައްސަލަ އިތުރަށް ހޫނުވިޔަ ނުދިނުމަށް މަސައްކަތް ކުރުމަށެވެ.
އިންޑިއާއިން އދއަށް ކަނޑައަޅާފައި ހުންނަވާ ދާއިމީ މަންދޫބު ރުޗިރާ ކަމްބޯޖް ވިދާޅުވީ، މިދިޔަ މެއިމަހު މަޝްވަރާކުރެވުނު ހަނގުރާމަ ހުއްޓާލުމުގެ އެއްބަސްވުމަށް ބައިނަލްއަގްވާމީ މުޖުތަމައުން އެއްބާރުލުން ދިން ނަމަވެސް، ހަމަނުޖެހުންތައް މުޅިން ކޮންޓްރޯލު ނުކުރެވުމަކީ ނުހަނު ކަންބޮޑުވާ ކަމެއް ކަމަށެވެ.
ޣައްޒާގެ ޙާލަތާ ބެހޭގޮތުން އ.ދ.ގެ ސަލާމަތީ މަޖިލީހުގައި ހޯމަ ދުވަހު ބޭއްވެވި ބައްދަލުކުރެއްވުމުގައި ކަމްބޯޖު ވަނީ ވާހަކަ ދައްކަވާފައެވެ.
އެންމެ ފަހުގެ ހަމަނުޖެހުމުގައި ކުޑަކުދިންވެސް ހިމެނޭ ގޮތަށް އެތައް ބަޔަކު މަރުވެ އެތައް ބަޔަކު ޒަޚަމްވެފައިވާ ކަންވެސް ކަމްބޯޖު ވަނީ ފާހަގަ ކުރައްވާފައވެ.
އ.ދ.އާއި، ބައިނަލްއަޤްވާމީ މުޖްތަމަޢުގެ މެންބަރުންނާއި، ސަރަޙައްދުގެ ޤައުމުތަކާއި، ޚާއްޞަކޮށް މިޞްރުން ދާއިމީ ޞުލްޙައެއް ހޯދުމަށް ކުރަމުންދާ ޑިޕްލޮމެޓިކް މަސައްކަތްތަކަށް އިންޑިއާއިން ތާއީދު ކުރާ ކަމުގައި އެކަމަނާ ވިދާޅުވިއެވެ.
ކަމްބޯޖް ވިދާޅުވީ، މި މައްސަލައިގެ ހައްލަކީ ފަލަސްތީނުގެ ދައުލަތެއް ގާއިމް ކުރެވުން ކަމަށާއި އަދި އެކަމަށްޓަކައި އިސްރާއީލާއި ފަލަސްތީނާ ދެމެދު އަލުން މަޝްވަރާތައް ފެށުމަށް ގޮވާލައްވާ ކަމަށް ވިދާޅުވިއެވެ.
