ސްރީލަންކާގެ ރައީސް ގޯތާބޭ ރާޖަޕަކްސަ ތައިލެންޑަށް ވެންނެވުމަށް ހުއްދައަށް އެދި ސްރީލަންކާ ސަރުކާރުން ތާއީ ސަރުކާރަށް ހުށަހަޅައިފިއެވެ.
ލަފާ ކުރެވޭ ގޮތުގައި ރައީސް ގޯތާ ތާއިލެންޑަށް ވަޑައިގަންނަވާނީ މާދަމާ ބުރާސްފަތި ދުވަހުއެވެ.
ތާއީ ފޮރިން މިނިސްޓްރީން ބުނެފައި ވަނީ ދެ ގައުމުގެ ދެމެދު 2013ގައި ސޮއި ކޮށްފައިވާ އެއްބަސްވުމުގެ ދަށުން ރައީސް ގޯތާއަށް ތައިލެންޑަށް ވެންނެވޭނެ ކަމަށެވެ. އަދި އެއީ އެނބުރި ދަތުރު ކުރައްވާ ގޮތަށާއި ހިމާޔަތް ހޯދުމެއް ނެތި ކުރައްވާ ދަތުރެއްގެ ގޮތުގައެވެ. އަދި އެފަދަ އެދުމެއް ސްރީލަންކާއިން އެދިފައި ނުވާ ކަމަށްވެސް ފޮރިން މިނިސްޓްރީން ވަނީ ބުނެފައެވެ.
ގޯތާ މިހާރު ހުންނެވީ ސިންގަޕޫރުގައެވެ. ސިންގަޕޫރުގެ ފޮރިން މިނިސްޓަރ ވީވިއަން ބާލާކްރިޝްނަން ވިދާޅުވީ ސިންގަޕޫރު ސަރުކާރުން ރައީސް ގޯތާއަށް ޚާއްސަ އިމްތިޔާޒެއްވެސް ހިމާޔަތެއްވެސް އަދި މެހުމާންދާރީއެއްވެސް އަދާކޮށްފައި ނުވާނެ ކަމަށެވެ.
ޖުލައި 14ގައި ގޯތާ ސިންގަޕޫރަށް ވަޑައިގަތީ ރާއްޖޭގައި މަޑު ކުރެއްވުމަށްފަހުއެވެ.
