ގައްޒާގައި އިޒްރޭލުން ގާއިމް ކުރި ދުނިޔޭގެ އެންމެ ބޮޑު ކޮންސެންޓްރޭޝަން ކޭމްޕްގެ ކަށިނަރުތައް ކޮށާލުމަށްފަހު، އޮކްޓޯބަރު ހަތް ވަނަ ދުވަހު ފަލަސްޠީނު މީހުން ފެށި އަޤްޞާ ޠޫފާނުގެ މިނިވަންކަމުގެ ހަނގުރާމައިގެ ނާކާމިޔާބީ ޒިންމާ އިޒްރޭލު ބޮޑު ވަޒީރު ނަތަންޔާހޫ ނަގަން ޖެހޭނެ ކަމަށް އެކަން ތަހުގީގު ކުރާ ކޮމިޓީން ބުނެފިއެވެ.
އަޤްޞާ ޠޫފާނު ފެށުނު ގޮތާއި އެ ޠޫފާނުގައި ފަލަސްޠީނު މީހުން ޒަޔަނިސްޓު ޓެރަރިސްޓް ސިފައިން ގިއްގަޅުވާލި ގޮތާ ބެހެ ގޮތުން ހޯދުމަށް އިޒްރޭލުން ވަނީ މަދަނީ ތަހުގީގު ކޮމިޓީއެއް އެކުލަވާލާފައެވެ.
އެ ކޮމިޓީން ބުނެފައި ވަނީ ސަރުކާރުން ރައްޔިތުންނަށް ރައްކާތެރިކަން ދިނުމުގައި ނާކާމިޔާބުވެފައިވާ ކަމަށާއި އެކަމަށްވެސް ނަތަންޔާހޫ، ޒިންމާ އުފުލަން ޖެހޭ ކަމަށެވެ.
އިޒްރޭލުގެ ތަހުގީގު ކޮމިޓީން ބުނީ އެމީޙުންގެ ހޯދުންތަކުން އިޒްރޭލުގެ ނާކާމިޔާބީ ސާބިތުކޮށްދޭ މަދުވެގެން 120 ހެކިބަސް އެއްކޮށްފައިވާ ކަމަށެވެ. އަދި ޒަޔަނިސްޓުންގެ ބޮޑުވަޒީރު ނަތަންޔާހޫ އަކީ "ޒަޔަނިސްޓު ޔަހޫދުންގެ ޤައުމުގެ ތާރީޚުގައި ކުރިމަތިވި އެންމެ ބޮޑު ކާރިސާއަށް" ޒިންމާވާން ޖެހޭ ފަރާތް ކަމަށެވެ.
ޔެޑިއޮތު އަހްރޮނޮތު ނޫހުން ރިޕޯޓްކޮށްފައިވާ ގޮތުގައި އަޤްޞާ ޠޫފާނުގެ ހަމަލާގެ ސަބަބުން މަރުވެފައިވާ ޔަހޫދުންނާއި އަތުލައިގަތް ހަނގުރާމައިގެ އަސީރުންގެ އާއިލާތަކުން ވަނީ ސަރުކާރުގެ އަމަލުތައް ތަހުގީގު ކުރުމަށް މީގެ މަސްތަކެއް ކުރިން ކޮމިޓީއެއް އެކުލަވާލުމަށް އެދިފައެވެ.
އެ އާއިލާތަކުން ބުނީ ނާކާމިޔާބީތައް ތަހުގީގު ކުރަން ބޭނުންވަނީ އެކަންކަން ތަކުރާރު ނުވުމަށް އަޅަންޖެހޭ ފިޔަވަޅުތަކާއި ގެންނަން ޖެހޭ ބަދަލުތައް ދަނެގަތުމަށާއި އޭގެ އިތުރުން ނާކާމިޔާބީއަށް ޒިންމާދާރުވާން ޖެހޭ މީހުން ދެނެގަނެ ކަން ހިނގި ގޮތުގެ ފުނަށް ދިއުމަށެވެ.
މިކޮމިޓީން ތުހުމަތު ކުރާ ގޮތުގައި ނަތަންޔާހޫ ދަނީ ކޮމިޓީގެ މަސައްކަތަށް ހުރަސްއަޅަމުންނެވެ.
