އެމެރިކާގެ ރައީސް ޑޮނަލްޑް ޓްރަމްޕްގެ ގައުމީ ސަލާމަތާ ބެހޭ ކުރީގެ މުޝީރު ޖޯން ބޯލްޓަން މަރާލަން ރޭވި ކަމުގެ ތުހުމަތުގައި އީރާނުގެ މީހެއްގެ މައްޗަށް އެމެރިކާއިން ދައުވާ އުފުލައިފިއެވެ. އެމެރިކާގެ އޮފިޝަލުން ވިދާޅުވީ އީރާނުގެ އިސްލާމިކް ރިވޮލިއުޝަނަރީ ގާޑުގެ މެމްބަރެއް ކަމަށްވާ ޝަހްރާމް ޕޫރްސާފީ މިހާރު ހުރީ އީރާނުގައި ކަމަށާއި އޭނާ ޝަރިއަތަށް ބޭނުންވާ ކަމަށެވެ.
ޕޫރްސާފީ މަސައްކަތް ކުރަމުން ގެންދަނީ އީރާނުގެ އެންމެ ބާރުގަދަ އަސްކަރީ ކޮމާންޑަރު ޤާސިމް ސުލެއިމާނީ އަވަހާރަކޮށްލުމަށް އެމެރިކާއިން ދިން ޙަމަލާގެ ބަދަލު ހިފުމުގެ ގޮތުން ކަމަށް އެމެރިކާއިން ބުނެއެވެ.
ސުލެއިމާނީ އަކީ މެދުއިރުމަތީގައި އީރާނުގެ އަސްކަރީ އޮޕަރޭޝަންތަކުގައި އިސްކޮށް އުޅުއްވި ބޭފުޅެކެވެ.
އުމުރުން 62 އަހަރުގެ ސުލައިމާނީއަކީ އީރާންގެ އެލީޓް ޤުދުސް ފޯސްގެ ވެރިޔަކަށް ހުންނެވި ބޭފުޅެކެވެ. ޓްރަމްޕްގެ އަމުރަށް އިރާގުގެ ވެރިރަށް ބަޣުދާދުގެ އެއާޕޯޓުގައި އޭނާ އަވަހާރަކޮށްލީ 2020 ވަނަ އަހަރުގެ ޖެނުއަރީ މަހު އެވެ.
މި ދައުވާ އިއުލާން ކުރަމުން އެމެރިކާއިން ބުނެފައި ވަނީ ޕޫސާފީ ވަނީ ބޯލްޓަން މަރާލަން އެމެރިކާގައި ތިބި ބަޔަކަށް 300،000 ޑޮލަރު ދޭން މަސައްކަތް ކޮށްފައި ކަމަށެވެ.
