އިސްލާމްއާބާދުގައި ސީއައިއޭގެ ކުރީގެ ސްޓޭޝަން ޗީފެއް ހިންގާ ކޮންސަލްޓިން ކުންފުންޏެއް ޕާކިސްތާނުގެ އިމްރާން ޚާންގެ ސަރުކާރުން ބޭނުން ކުރިކަމަށް ޕާކިސްތާން މީޑިއާ ބުނެއެވެ. މި ކުންފުނިން ވަނީ ލޮބީކޮށް ޕާކިސްތާނާއި އެމެރިކާއާ ދެމެދު އޮންނަ ގުޅުމަށް ތަހްރީކޭ އިންސާފް ޕާޓީއަށް ލަފާ ދިނުމަށް ހަރަކާތްތެރި ވެފައެވެ.
ގްރެނިއާ ކޮންސަލްޓިން އެލްއެލްސީގެ ރޮބަޓް ލޯރެންޓް ގްރެނިއާ އާއެކު އެއްބަސްވުމުގައި ސޮއިކޮށްފައި ވަނީ 2021 ވަނަ އަހަރުގެ ޖުލައި މަހު އިފްތިހާރު ރަހްމާން ދުރާނީ އެވެ. އޭނާއަކީ ތަހްރީކޭ އިންސާފްގެ އިސްމަސްއޫލު ވެރިއެކެވެ.
ގްރެނިއަރ އަކީ 2001 ވަނަ އަހަރު އެމެރިކާއިން އަފްޣާނިސްތާނަށް އަރައިގަތް ދުވަސްވަރު އިސްލާމްއާބާދުގައި ސީއައިއޭގެ ސްޓޭޝަން ޗީފްގެ މަގާމުވެސް އަދާކުރެއްވި ސީއައިއޭގެ ވެޓެރަންއެކެވެ. އަދި ފަހުން 2004 އިން 2006 އަށް އެ އެޖެންސީގެ ކައުންޓަރ ޓެރަރިޒަމްގެ އެންމެ އިސް އޮފިޝަލެއްގެ މަގާމު ވެސް އޭނާ އަދާކުރެއްވިއެވެ.
