އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އޭނާގެ ކުރީގެ ޑިފެންސް މިނިސްޓަރު ޔޯއަވް ގަލަންޓާ ދެކޮޅަށް އިންޓަނޭޝަނަލް ކްރިމިނަލް ކޯޓުން ނެރުނު އަމުރު ތަންފީޒު ކުރުމަށް ޔޫރަޕިއަން ޔޫނިއަންގެ ޚާރިޖީ ސިޔާސަތާ ބެހޭ މަސްއޫލުވެރިޔާ ޖޯސެޕް ބޮރެލް މިއަދު ގޮވާލައްވައިފިއެވެ.
އިޓަލީގައި އޮތް ޖީ7 ބައްދަލުވުމުގެ ހަސާވާގައި ވާހަކަ ދައްކަވަމުން ބޮރެލް ވަނީ ބައިނަލްއަގްވާމީ ކްރިމިނަލް ކޯޓަށް ޔޫރަޕްގެ ގައުމުތަކުން އަދާކުރަން ޖެހޭ ވާޖިބު އަދާކުރަންވާނެ ކަމަށާއި ނަތަންޔާހޫ އާއި ގަލަންޓާ ދެކޮޅަށް ކޯޓުން ނެރުނު އަމުރު ތަންފީޒު ކުރަން ޖެހޭ ކަމަށް ވިދާޅުވެފަ އެވެ.
އޭނާ އިތުރަށް ވިދާޅުވީ "ބައިނަލްއަގްވާމީ ކްރިމިނަލް ކޯޓު ޕޫޓިންއާ ދެކޮޅަށް އަމުރު ކުރުމުން އެކަން ބަލައިގަނެ، ނަތަންޔާހޫއާ ދެކޮޅަށް އަމުރެއް ކުރާއިރު އެކަމުގައި ކޯޓުއާ ދެކޮޅު ހެދުމަކީ ގަބޫލު ކުރެވޭނެ ކަމެއް ނޫން" ކަމަށެވެ.
ނޮވެމްބަރު 22 ވަނަ ދުވަހު އިންޓަނޭޝަނަލް ކްރިމިނަލް ކޯޓުން ވަނީ ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތައް ހިންގުމުގެ ތުހުމަތުގައި ނަތަންޔާހޫ އާއި ގަލަންޓް ހައްޔަރުކުރުމުގެ އަމުރެއް ނެރެފަ އެވެ.
ލުބުނާނުގައި ހަނގުރާމަ ހުއްޓާލުމުގެ އެއްބަސްވުމާ ގުޅޭ ގޮތުން ބޮރެލް ވިދާޅުވީ އިޒްރޭލުން އެ އެއްބަސްވުމާ ދެކޮޅު ހަދަން ޖެހޭ "ބަހަނާއެއް ނެތް" ކަމަށާއި އެއީ އެ އެއްބަސްވުމަށް ބޭނުންވާ ހުރިހާ ސަލާމަތީ ޔަގީންކަމެއް ޔޫރަޕުން ފޯރުކޮށްދޭނެ ކަމަށެވެ.
