އެމެރިކާއިން، މީގެ އެއް އަހަރު ކުރިން އަފްޣާނިސްތާނުގެ ބިމުން ސިފައިން ފައިބައިގެން ދިޔައިރު، ތާލިބާނުންގެ އަތްމައްޗަށް ހަތް ބިލިއަން ޑޮލަރުގެ އަސްކަރީ ސާމާނު ދޫކޮށްލާފައިވާ ކަމަށް މީޑިއަ ރިޕޯޓްތައް ބުނެއެވެ.
2021 ވަނަ އަހަރުގެ އޮގަސްޓް މަހު ތާލިބާނުން އަފްޣާނިސްތާނުގެ ވެރިކަން ފުރޮޅާލުމާއެކު އެމެރިކާ ސިފައިން ވަނީ ފައިބައިގެން ގޮސްފައެވެ.
ކުއްލިއަކަށް އެމެރިކާ ސިފައިން ހަށިފޮޅާލައި ފުރައިގެން ދިއުމުން ގިނަ އަދަދެއްގެ ހަތިޔާރުތައް ލިބުނީ ތާލިބާނަށެވެ.
އެމެރިކާގެ ޑިޕާޓްމަންޓް އޮފް ޑިފެންސް އޮފީހުގެ އިންސްޕެކްޓަރ ޖެނެރަލްގެ ރިޕޯޓެއްގައިވާ ގޮތުން މި ސާމާނުތަކަކީ މައިންތަކާ ދެކޮޅަށް ބޭނުން ކުރެވޭ ބާވަތުގެ އެމެރިކާ ސިފައިން ދުއްވި ޚާއްސަ ވައްތަރުގެ އުޅަނދުތަކެވެ.
އަދި އެ ވެހިކަލްތަކަށް ގާތްގަނޑަކަށް 4.12 ބިލިއަން ޑޮލަރު ޚަރަދުވި ކަމަށް އަފްޣާން މީޑިއާގައި ރިޕޯޓްކޮށްފައިވެއެވެ. މި ރިޕޯޓްގައި އިތުރަށް ތަފްސީލުކޮށްފައިވާ ގޮތުން އެމެރިކާއިން ދޫކޮށް ދިޔަ ހުރިހަިއ ހަތިޔާރެއްގެ ޖުމުލަ އަގު 7.12 ބިލިއަން ޑޮލަރަށް އަރާނެއެވެ.
އަދި 512 މިލިއަން ޑޮލަރުގެ ތިން ލައްކަ ސަތާރަ ހާސް ކުދި ހަތިޔާރުވެސް ދޫކޮށްފައިވާ ކަމަށް ވެއެވެ.
އެމެރިކާ ސިފައިން ދޫކުރި ހަތިޔާރުގެ ތެރޭގައި މުވާސަލާތީ ވަސީލަތްތަކާއި ގޮވާތަކެތި ހޯދާ ސާމާނާއި ނައިޓް ވިޝަން އަދި އެހެނިހެން ގިނަ ސަރވޭލަންސް އިކުއިޕްމަންޓްތައްވެސް ތާލިބާނަށް ލިބުނެވެ.
ލަފާ ކުރެވޭ ގޮތިގައި އެމެރިކާއިން ވިހި އަހަރުގެ ތެރޭގައި އަފްޣާނިސްތާންގައި 84 ބިލިއަން ޑޮލަރު ހަތިޔާރަށް ހޭދަކޮށްފައި ވާނެއެވެ. އެ މުއްދަތުގައި އެމެރިކާއިން 427،300 ހަތިޔާރާއި 258،300 ސްނައިޕަރ ރައިފަލާއި، 64،300 ފިސްތޯލައާއި، 56،155 މެޝިންގަންއާއި، 31،000 ރޮކެޓް ޕްރޮޕެލްޑް ގްރެނޭޑް ލޯންޗާއާއި، 224 ހަވިޓްޒާ ބަޑިއަށް 612 މިލިއަން ޑޮލަރު ޚަރަދުކޮށްފައިވާ ކަމަށް އެމެރިކާގެ ދިފާއީ އޮޑިޓަކުން ބުނެފައި ވެއެވެ.
