ޗައިނާއިން ވަނީ މިއަހަރުގެ ފުރަތަމަ ހަނަފަސް ކަމުގެ އެލާޓް ނެރެފައެވެ. ޖަންގަލީގައި ރޯވެފައި ވުމުގެ ސަބަބުން އަލިފާންގަނޑު ނިއްވުމަށް މަސައްކަތް ކުރަމުން ދެއެވެ. އަދި ސްޕެޝަލިސްޓް ޓީމުތަކުން ދަނީ ޔަންގްޒޭ ކޯރު ސަރަހައްދުގެ ދަނޑުތައް ޙިމާޔަތް ކުރުމަށް މަސައްކަތް ކުރަމުންނެވެ.
ބުރާސްފަތި ދުވަހުގެ ރޭ ދަންވަރު ނެރުނު ގައުމީ 'ޔެލޯ އެލާޓް' ނެރެފައިވަނީ ހުޅަނގު ދެކުނުގެ ސިޗުއާން އިން ފެށިގެން ޔަންގްޒޭ ޑެލްޓާގެ ޝަންހާއީއާ ހަމައަށް ބޮޑު ސަރަހައްދަކަށް ހަފްތާތަކެއް ވަންދެން އިންތިހާއަށް ހޫނުކަން ކުރިމަތިވެފައި ވުމުންނެވެ. މި އެލާޓަކީ ބެއިޖިންގެ މިންގަނޑުގައި ދީފައިވާ އެންމެ ސީރިއަސް އިންޒާރެވެ.
ދައުލަތުގެ ނޫސް އެޖެންސީ ޝިންހުއާއިން ބުނާ ގޮތުގައި މެދުތެރޭ ޗައިނާގެ ޖިއާންގްޝީ ޕްރޮވިންސްގައި ހުންނަ ޔަންގްޒޭގެ ފެންގަނޑު ޖަމާވާ އެއް ސަރަހައްދުގައި އާދައިގެ މަތިން އަހަރުގެ މިހިސާބުގައި ހުންނަން ޖެހޭ ވަރަށް ވުރެން ތިންބައިކުޅަ އެއްބަޔަށް ފެން މަދުވެފައެވެ.
ޗޮންގްޗިންގްގެ ހުޅަނގު ދެކުނު ސަރަހައްދުގެ 34 ކައުންޓީއެއްގެ 66 ކޯރު ހިކިފައިވާ ކަމަށް ސްޓޭޓް ބްރޯޑްކާސްޓަރު ސީސީޓީވީން މިއަދު ބުނެފި އެވެ.
އެ ސަރަހައްދުތަކުގެ ސަރުކާރު އިދާރާތަކުގެ ޑޭޓާއާ ހަވާލާދީ ސީސީޓީވީން ބުނެފައިވަނީ މިއަހަރު ޗޮންގްޗިންގަށް ވާރޭ ވެހޭ މިންވަރު މޫސުމުގެ ހަމަތަކާ އަޅާބަލާއިރު 60 ޕަސެންޓަށް ދަށްވެފައިވާ ކަމަށާއި، ބައެއް ޑިސްޓްރިކްޓްތަކުގެ ފަސްގަނޑުގައި ތެތްކަން ވަރަށް ބޮޑަށް ދަށްވެފައިވާ ކަމަށެވެ.
ޗޮންގްޗިންގްގެ އާބަން ސެންޓަރުގެ އުތުރުގައި އޮންނަ ބެއިބޭ ޑިސްޓްރިކްޓްގެ ފިނިހޫނުމިން ބުރާސްފަތި ދުވަހު ހުރީ 45 ޑިގްރީ ސެލްސިއަސް (113 ޑިގްރީ ފަރެންހައިޓް) ގައެވެ.
ހުކުރު ދުވަހުގެ ހެނދުނު ޗައިނާގެ އެންމެ ހޫނު 10 ތަނުގެ ތެރެއިން ހަ ތަނެއް އޮތީ ޗޮންގްޗިންގްގައެވެ.
ޗޮންގްޗިންގް ސަރަހައްދުގެ އިންފްރާސްޓްރަކްޗާ އާއި ކުއްލި ހިދުމަތްތަކަށް ދަތިތަކެއް ކުރިމަތިވެފައިވާއިރު، މުޅި ސަރަހައްދުގައި ފަރުބަދަތަކާއި ޖަންގަލިތަކުގައި އަލިފާން ރޯވުމުން ފަޔާ ފައިޓަރުން ތިބެމުން ދަނީ ހައި އެލާޓްގަ އެވެ. ދައުލަތުގެ މީޑިއާއިން ވެސް ދަނީ ހީޓްސްޓްރޯކް ޖެހޭ މީހުންގެ އަދަދުތައް ރިޕޯޓް ކުރާ މިންވަރު އިތުރު ކޮށްފައެވެ.
ބއެއް ޑިސްޓްރިކްޓްތަކުން ވަނީ ހޫނުކަމާ ހެދި ނުރައްކާ ބޮޑު ވުމުން ގޭހުގެ ޚިދުމަތް ދިނުންވެސް ހުއްޓާލާފައެވެ. އަދި ޗޮންގްކިންގް އެގްރިކަލްޗަރަލް ބިއުރޯއިން ވަނީ ހޫނު މޫސުމުގެ ދަނޑުވެރިކަމުގެ ކުރިން ލިބޭ ގެއްލުންތައް ފޫބައްދަން ނާޒުކު ގަސްގަހާ ގެހީގެ ބާވަތްތައް ހިމާޔަތްކޮށް ގަސްއިންދުން ފުޅާކުރުމަށް ތަޖުރިބާކާރު ޓީމުތައް އުފައްދާފަ އެވެ.
ޗައިނާގެ އިމަޖެންސީ މިނިސްޓްރީން ބުރާސްފަތި ދުވަހުގެ ރޭ ދަންވަރު ލިބުނު ތަފާސް ހިސާބުތަކުން ދައްކާ ގޮތުގައި ޖުލައި މަހު އެކަނިވެސް ހޫނުމިން މަތިވުމުން 2.73 ބިލިއަން ޔުއާން (400 މިލިއަން ޑޮލަރު)ގެ ސީދާ އިގްތިސާދީ ގެއްލުންތަކެއް ލިބިފައިވެއެވެ. އަދި 5.5 މިލިއަން މީހުންނަށް މިކަމުން ސީދާ އަސަރު ކޮށްފައި ވެއެވެ.
މީގެ އިތުރުން ޗައިނާގެ ނޭޝަނަލް މީޓިއޮރޮލޮޖިކަލް ސެންޓަރުން ވައިބޯ ޗެނަލްގައި ހުކުރު ދުވަހު ރެޑް އެލާޓް އާކޮށްފައިވެއެވެ. އަދި މިހާރު ކުރިމަތިވެފައިވާ ހޫނުކަމުގެ ރާޅު ކުޑަވާން ފަށާނީ އޮގަސްޓް 26 ވަނަ ދުވަހު ކަމަށް ވެސް ސަރުކާރުގެ މޫސުމާ ބެހޭ އިދާރާގެ ފޯކާސްޓަރުން ލަފާކޮށްފައިވެ އެވެ.
