ޕީޓީއައިގެ ޗެއާމަން އިމްރާން ޚާން ގެންދަވަނީ ޝެހްބާޒް ޝަރީފް އިސްވެ ހުންނަވާ ކޯލިޝަން ސަރުކާރު ވައްޓާލުމަށް މީހުންގެ ތާއީދު ހޯދުމަށްޓަކައި ތަފާތު ތުހުމަތުތައް އުފައްދަވައިގެން ވަކި ފަރާތަކަށް ނުޖެހި ތިބި މީހުންނަށް ޕްރެޝަރު ކުރައްވަމުންނެވެ. ސިފައިންގެ މުއައްސަސާވެސް ހިމެނޭ ގޮތަށެވެ.
މިހާރު ޚާނާ މެދު އުފެދޭ ބޮޑު ސުއާލަކީ ދުވަހަކުވެސް ސިފައިންގެ މުއައްސަސާއިން ޚާނަށް އިތުބާރު ކުރާނެ ތޯއެވެ؟
ސިފައިންގެ ފަރާތްތަކުން ބުނަނީ އެމީހުންނަކީ އަބަދުވެސް ނިއުޓްރަލް ބައެއް ކަމަށާއި ޕޮލިޓިކަލް އިންޖިނިއަރިންގެ މާޒީގައި ހެދި ގޯސްތައް ތަކުރާރު ކުރުމުގެ ވިސްނުމެއް ނެތް ކަމަށެވެ. ނަމަވެސް އިމްރާން ޚާން ދެއްވި ތަގްރީރެއްގައި ބުރާސްފަތި ދުވަހު އަނެއްކާވެސް ސާފުކޮށް ސިފައިންނަށް ތަދައްޚުލްވުމަށް ދައުވަތު ދެއްވާފައި ވެއެވެ. ހަމައެއާއެކު އޭނާ ވަނީ އަނެއްކާވެސް ބައެއް ތުހުމަތުތައް ތަކުރާރުކޮށް އާ ވާހަކަތަކެއް ގެންނަވައި ސިފައިންގެ މުއައްސަސާ ލަދުގަންނަވަން މަސައްކަތް ކުރައްވާފައި ކަމަށް މީޑިއާއިން ބުނެއެވެ.
"ތިޔަބޭފުޅުންގެ ސިޔާސަތު މުރާޖައާ ކުރަން އަދިވެސް ވަގުތު އެބައޮތް،" ކޮރަޕްޓް ޕޮލިޓީޝަނުންނަށް ސިފައިން ތާއީދުކުރާ ކަމަށް ތުހުމަތު ކުރައްވަމުން ޚާން ސިފައިންނަށް އިންޒާރު ދެއްވި އެވެ.
ޚާންގެ ވެރިކަން ވައްޓާލި ފަހުން އޭނާ ގެންދަވަނީ އަލުން ވެރިކަމަށް ވަޑައިގަތުމަށް މަގުފަހި ކުރުމަށް ކޯލިޝަންގެ ސަރުކާރު ވައްޓާލުމަށް ސިފައިންނަށް ޕްރެޝަރު ކުރައްވަމުންނެވެ. މިހާރު ސަރުކާރުގައި ތިއްބެވި ސިޔާސީ ލީޑަރުންނާ ވާހަކަ ދައްކަވަން ޚާން ބޭނުންފުޅު ނުވާ ކަމަށް ވިދާޅުވެއެވެ.
މިދިޔަ ހަތަރު މަސް ދުވަހުގެ މުޅި ދުވަހު ވެސް އޭނާ ވަނީ ސިފައިނެގެ މުއައްސަސާއަށް އުންމިދު ކުރައްވައިގެން އެތައް މަސައްކަތެއް ކުރައްވާފައެވެ.
