އާދަޔާ ޚިލާފަށް ބޯކޮށް ވާރޭވެހުމުގެ ސަބަބުން ކުރިމަތިވި ފެންބޮޑުވުންތަކުގެ ސަބަބުން ފާއިތުވި ދެ މަސް ދުވަހުގެ ތެރޭގައި މުޅި ޕާކިސްތާނުގައި 777 މީހުން ވަނީ މަރުވެފަ އެވެ. ޖޫން 14 ވަނަ ދުވަހުން ފެށިގެން ވާރޭވެހި ފެންބޮޑުވުމުގެ ސަބަބުން 1.8 މިލިއަން މީހުންގެ ދިރިއުޅުމަށް ނޭދެވޭ އަސަރުކޮށްފައި ވެއެވެ.
އޭގެ ތެރެއިން 317،678 މީހުން އަދިވެސް ދިރިއުޅެމުން ދަނީ އެހީދޭން ހަދާފައިވާ ރިލީފް ކޭމްޕްތަކުގައި ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން ބުނެއެވެ. އަދި މަރުވި 777 މީހުންގެ ތެރެއިން 300 މީހުން މަރުވެފައި ވަނީ އޮގަސްޓް 1 ވަނަ ދުވަހުން ފެށިގެން ދިމާވެފައިވާ ފެންބޮޑުވުމުގައެވެ.
ފެންބޮޑުވެފައިވާ ހުޅަނގު ދެކުނު ބަލޫޗިސްތާނާއި ދެކުނު ސިންދު އަދި ޕަންޖާބުގެ އިރުމަތީ ޕްރޮވިންސްތަކުގައި ރަށް ފުށުގެ ހިސާބުތަކަށް ގިނަ ގެއްލުންތަކެއް ލިބިފައިވެއެވެ. ޕާކިސްތާންގެ އެހީދޭ ފަރާތްތަކުން ބުނެފައި ވަނީ ހާލުގައި ޖެހިފައިވާ އެންމެނަށް މިދިޔަ ހަފްތާއާ ހަމައަށް ބޭނުންވާ ކާނާއާއި ޒަރޫރީ ސާމާނު ފޯރުކޮށްދީ ނިމިފައިވާ ކަމަށެވެ. ނަމަވެސް މީސްމީޑިއާގައި ދައުރުވަމުންދާ ވީޑިއޯތަކުން ދޭހަވަނީ އަދިވެސް ގިނަ ބަޔަކު އެހީއަށް އިންތިޒާރު ކުރަމުންދާ ކަމަށެވެ.
މުޅި ޕާކިސްތާނުގައި ފެންބޮޑުވުމުގެ ސަބަބުން މަގުތައް ދޮވިގެން ގޮސފައި ވެއެވެ. އަދި ބްރިޖްތަކަށް ގެއްލުން ލިބުމުގެ އިތުރުން ގާތްގަނޑަކަށް 60،000 ގެވެސް ވަނީ ވީރާނަވެފައެވެ.
ޕާކިސްތާނުގައި ޖުލައި މަހުން ފެށިގެން ސެޕްޓެމްބަރު މަހުގެ ނިޔަލަށް މޮންސޫން ކުރިއަށް ދެއެވެ.
