ޑޮނަލްޑް ޓްރަމްޕް އޭނާގެ މާއަ ލަގޯ ރިސޯޓުގައި އެމެރިކާ ދައުލަތުގެ ސިއްރު ސިއްކަ ޖެހި 300 އެއްހައި ލިޔެކިޔުން ވަގަށް ނަގައިގެން ގެންގުޅުކަމުގެ ތުހުމަތުގައި އޭނާއާ ދެކޮޅަށް ޖިނާއީ ދައުވާ ކުރުމުގެ ފުރުސަތު އޮތްކަމަށް ގާނޫނީ ތަޖުރިބާކާރަކު ބުނެފިއެވެ.
އެފްބީއައިގެ ކުރީގެ އިސް ގާނޫނީ މުސްތަޝާރު އެންޑްރޫ ވައިސްމަން ވިދާޅުވަނީ ވަގަށް ނަގާފައިވާ ލިޔެކިޔުންތަކާ ބެހޭ ގޮތުން ނިއުޔޯކް ޓައިމްސް އިން ނެރުނު ރިޕޯޓުތަކަކީ ކުރީގެ ރައީސް އަކު ކުރައްވަފާނެ ކަމަށް ގަބޫލު ނުކުރެވޭ ލަދުވެތި އަމަލެއް ކަމަށެވެ.
ނިއުޔޯކް ޓައިމްސް ރިޕޯޓުގައިވާ ގޮތުން ވައިޓް ހައުސްއިން ޓްރަމްޕް ވަގަށް ނަގާފައިވާ ހައްސާސް ސިއްރު ޑޮކިއުމެންޓްތަކުގެ ބާވަތެއް މުޅިން ސާފެއް ނޫނެވެ. ނަމަވެސް ޓްރަމްޕް މަގާމުން ވަކިވިތާ ގާތްގަނޑަކަށް އަހަރެއްހާ ދުވަސް ފަހުން ޖެނުއަރީ މަހު އަރުޝީފްއާ ހަވާލުކުރުމަށް ބަންދުކުރި 15 ފޮށި އޭނާގެ ގެއިން ފެނިފައިވާ ކަމަށް ބެލެވެއެވެ.
