ޤަތަރަށް ރަސްމީ ދަތުރުފުޅެއްގައި ވަޑައިގަތް ޕާކިސްތާންގެ ބޮޑު ވަޒީރު ޝަހްބާޒް ޝަރީފްގެ ދަތުރުފުޅު ކާމިޔާބު ކަމަށް ޕާކިސްތާން މީޑިއާއިން ސިފަ ކުރެއެވެ.
ގަތަރު އިންވެސްޓްމަންޓް އޮތޯރިޓީ (ކިޔުއައިއޭ) އިން ވަނީ ޕާކިސްތާންގައި ތިން ބިލިއަން ޑޮލަރު އިންވެސްޓް ކުރަން ނިންމާފައި ކަމަށް ޤަތަރުގެ އަމީރުގެ އޮފީހުން އިއުލާން ކުރިއެވެ.
ޝާހްބާޒް ޝަރޫފްގެ ދަތުރުފުޅާ ގުޅިގެން މީޑިއާގައި ބުނެފައި ވަނީ މިއީ ސާފު އަރަބި ބަހުން ވާހަކަ ދައްކަވާ ޕާކިސްތާންގެ ފުރަތަމަ ބޮޑުވަޒީރު ކަމަށެވެ.
ޕާކިސްތާނަށް އިގްތިސާދީ ހަލަބޮލިކަމެއް ކުރިމަތިވެފައިވާ މި ދަނޑިވަޅުގައި ބެލެންސް އޮފް ޕޭމަންޓްސްގެ ދަތިކަން އިންތިހާއަށް ބޮޑު ވެފައި ވެއެވެ. އަދި ބޭރު ފާސާގެ ރިޒާވް 7.8 ބިލިއަން ޑޮލަރަށް ދަށްވެފައިވެއެވެ.
އެ އަދަދު އެއީ މަހަކަށް ވުރެ ގިނަ ދުވަހު އިމްޕޯޓް ކުރުމަށް ކިރިޔާ ފުދޭވަރުގެ އަދަދެކެވެ. އަދި ކަރަންޓް އެކައުންޓް ޑެފިސިޓް ފުޅާވެގެން ގޮސް އެމެރިކާ ޑޮލަރާ އަޅާބަލާއިރު ރުފީސްގެ އަގު ވެއްޓިފައި ވެއެވެ.
ޖުލައި މަހު ޕާކިސްތާން އިންފްލޭޝަން އުޅުނީ 24 ޕަސެންޓަށް ވުރެ މަތީގައެވެ.
ބެލެވޭ ގޮތުގައި ޕާކސްތާނުން ޤަތަރަށް ޕީއައިއޭގެ ހިއްސާއާއި ނިއުޔޯކުގައި ހންނަ ޕާކިސްތާނުގެ އިންވެސްޓްމެންޓެއް ކަމަށްވާ ރޫޒަވެލްޓު ހޮޓެލްގެ ހިއްސާ ދޭނެއެވެ.
ޤަތަރޔގެ ތިން ބިލިއަން ޑޮލަރުގެ އިންވެސްޓްމެންޓާއެކު އަންނަ ހަފްތާގައި ޕާކސްތާން ބޮޑު ވަޒީރަށް އައިއެމްއެފްއާއެކު ފަސޭހަކަމާއެކު އިތުރު ލުޔެއް ހޯއްދެވުމަށް ބައްދަލު ކުރައްވަން ފަސޭހަފުޅުވާނެއެވެ.
