ޔޫރަޕްގައި މީޑިއާގެ މިނިވަންކަން ހަނިވާތީ ވިލާތު އިއްތިހޙާދުން ކަންބޮޑުވުން ފާޅުކޮށްފިއެވެ. ޔޫރަޕިއަން ކޮމިޝަނުން މިހާރު ވަނީ މި މައްސަލައާ ކުރިމަތިލާން ނިންމައި ނޫސްވެރިންނާއި އެޑިޓޯރިއަލް މިނިވަންކަން ހިމާޔަތްކުރުމަށް ނޫސްވެރިކަމުގެ މިނިވަންކަން ދެމެހެއްޓުމަށް ގާނޫނީ ޕެކޭޖެއް ކަމަށްވާ ޔޫރަޕިއަން މީޑިއާ ފްރީޑަމް އެކްޓް (އީއެމްއެފްއޭ) ފާސްކޮށް ތަންފީޒު ކުރުމަށް މަސައްކަތް ފަށާފައެވެ.
އީއެމްއެފްއޭ ޕެކޭޖަކީ ފާރަވެރިވުމާއި ޕްރޮޕެގެންޑާއަށް ޔޫރަޕްގެ މީޑިއާ ހުށަހެޅިފައި ވުމުން އެކަމާ ދެކޮޅަށް އެކުލަވާލާ ޕެކޭޖެކެވެ.
ޔޫރަޕިއަން ކޮމިޝަންގެ ރައީސް އުރްސުލާ ވޮން ޑަރ ލޭއެން 2021 ވަނަ އަހަރު ދެއްކެވި ސްޓޭޓް އޮފް ދަ ޔޫރަޕިއަން ޔޫނިއަންގެ ތަގުރީރުގައި އީޔޫގައި މީޑިއާގެ މިނިވަންކަމަށް ނުރައްކާ ކުރުން ހުއްޓުވުމުގެ މުހިންމުކަން ފާހަގަކުރެއްވިއެވެ.
އޭނާ ވިދާޅުވީ މީޑިއާ ކުންފުނިތަކަކީ ހަމައެކަނި ވިޔަފާރިއެއްގެ ގޮތުގައި ނުބެލެވޭނެ ކަމަށެވެ. މީޑިއާގެ ކުންފުނިތަކުގެ މިނިވަންކަމަކީ ކޮންމެހެން ބޭނުންތެރި ކަމެއް ކަމަށާއި ޔޫރަޕަށް ބޭނުންވަނީ އެ މިނިވަންކަން ރައްކާތެރިކޮށްދޭ ގާނޫނެއް ކަމުގައެވެ.
އައު ގާނޫނުގައި ވާގޮތުން މީޑިއާގެ ހިދުމަތްދޭ ފަރާތްތަކުން ވެސް ހާމަކަން ބޮޑު ގޮތަށް މިލްކުވެރިކަން ކަށަވަރު ކުރަން ޖެހޭނެ އެވެ. އީއެމްއެފްއޭގެ ދަށުން މީޑިއާ ކުންފުނިތަކަށް އެމީހުންގެ ހިއްސާދާރުންނަކީ ކޮބައިކަން އިއުލާން ކުރުން ލާޒިމު ވާނެއެވެ. މިއީ އެޑިޓޯރިއަލް މިނިވަންކަން ހަރުދަނާ ކުރުމަށް އަމާޒުކޮށްގެން އަޅާ ފިޔަވަޅެކެވެ.
ރިޕޯޓަރސް ވިތައުޓް ބޯޑާސް (އާރުއެސްއެފް) އިން ބުނާ ގޮތުގައި ޔޫރަޕިއަން ޔޫނިއަންގައި ނޫސްވެރިކަމުގެ މިނިވަންކަން އޮތީ "ދެ ހައްދުފަހަނަޅައި ދިއުމުގެ ދެމެދުގައި" ފިތިފައެވެ.
ނޯވޭ، ޑެންމާކް އަދި ސްވިޑެން ފަދަ އީޔޫގެ ބައެއް ގައުމުތަކުގައި މިނިވަން ނޫސްވެރިކަން ފުޅާވަމުން އައި ނަމަވެސް ޕޮލެންޑް، ހަންގޭރީ އަދި ގްރީސް ފަދަ އެހެން ގައުމުތަކުގައި ބޮޑެތި ނުރައްކާތަކާ ކުރިމަތިލާން ޖެހިފައިވެއެވެ.
އީޔޫގެ ނުތަނަވަސްކަން އިތުރު ވެގެން ދިޔައީ މިދިޔަ ހަފްތާގައި ބްރަސެލްސްގައި ބޭއްވި ޔޫރަޕިއަން ޕާލަމެންޓުގައި ގްރީސްގައި ސްޕައިވެއާ އެއް މީޑިއާއަށް ޖާސޫސްކުރަން ބޭނުން ކުރި މައްސަލައަކާ ގުޅިގެންނެވެ.
