އެމްޓީސީސީގެ އައު ޑްރެޖަރ ބޮޑު ޖައްރާފު ރަސްމީކޮށް އިފްތިތާޙު ކޮށްފިއެވެ. ހަމައެއާއެކު ގއ. ދާންދޫ ބިން ހިއްކުމުގެ މަޝްރޫޢުގެ ޢަމަލީ މަސައްކަތް ވެސް ވަނީ ފަށައިފައެވެ.

ދާންދޫގެ ބިން ހިއްކުމުގެ މަޝްރޫޢު ނިމޭއިރު، މިހާރު ދާންދޫގައި އޮތްވަރުގެ ޖާގައިގެ ބިމެއް އެރަށަށް އިތުރު ކުރެވިގެންދާނެއެވެ. އަދި މިހާރުގެ ދާންދުއަށް، އަލަށް މި ހިއްކާ ބިން، ބްރިޖަކުން ގުޅާލެވިގެން ދާއިރު، މި އައު ބިން، ވެގެންދާނީ، ޒަމާނީ ދާން ދޫގެ އާޙަޔާތެއްގެ ފެށުމަށް ކަމަށް އެމްޓީސީސީން ބުނެފައިވެއެވެ.

މަޝްރޫޢު ނިމިގެންދާއިރު، ރައްޔިތުން މޫދަށް އެރި، ހިތް އުފާކޮށްލާނެ އަތިރިމަތިތައް ލެވިގެންދާނެއެވެ. ދާންދޫގެ ބިން ހިއްކުމަށްޓަކައި ބޭނުންކުރެވޭނީ ބޮޑު ޖައްރާފެވެ. މިއީ މި ޖައްރާފު ބޭނުންކޮށްގެން ހިންގޭ ތަރައްޤީގެ އެންމެ ފުރަތަމަ މަޝްރޫޢެވެ. ބޮޑު ޖައްރާފު އެމްޓީސީސީގެ ފްލީޓްގައި ހިމެނުމާއެކު، އެމްޓީސީސީވަނީ މި ސަރަޙައްދުގައި ޑްރެޖިންގ ދާއިރާގެ އެންމެ ކުރީ ސަފުގައި ހިމެނޭ އެއް ކުންފުންޏަށްވެފައެވެ.

އައު ޑްރެެޖަރު ބޮޑު ޖައްރާފު އިފްތިތާހު ކުރުމާއި ދާންދޫ ބިން ހިއްކުމުގެ މަޝްރޫއު ފެށުމަށް ގއ. ދާންދޫގައި މިކަމަށް ރޭ ބޭއްވި މި ރަސްމިއްޔާތުގައި މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމާއި، ދާންދޫ ދާއިރާގެ މަޖިލިސް މެމްބަރު ޔަޢުޤޫބް ޢަބްދުالله އާއި ދާންދޫ ކައުންސިލްގެ ރައީސް މުޙައްމަދު އާސިފުއާއި، އެމްޓީސީސީގެ ޗީފް އެގްޒެކެޓިވް އޮފިސަރ އާދަމް އާޒިމްގެ އިތުރުން އެމްޓީސީސީގެ އިސްވެރިން ބައިވެރިވެ ވަޑައިގެންނެވިއެވެ.

ދާންދޫ ބިން ހިއްކުމުގެ މަޝްރޫޢުގެ ދަށުން:

  • 000,975 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި ބިން ހިއްކުން

  • 807 މީޓަރުގެ ސަރަޙައްދެއްގައި ރިވެޓްމެންޓް ޖެހުން

  • 555 މީޓަރުގެ ސަރަޙައްދެއްގައި ގްރޮއިންސް ޖެހުން ހިމެެނެއެވެ.

މި މަޝްރޫޢަކީ 64.186 މިލިއަން ރުފިޔާގެ މަޝްރޫޢެކެވެ. ވޭތުވެދިޔަ 3 އަހަރުތެރޭ އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި ގިނަ މަޝްރޫޢުތަކެއް ނިންމާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްޤީގެ ދަތުރުގެ މުހިއްމު މަރުޙަލާއެއްގައެވެ. ކުންފުނި އުފެދުނީއްސުރެ ރާއްޖޭގެ ޢުމްރާނީ ތަރައްޤީ އާއި އިޖުތިމާޢީ ވަޞީލަތްތައް ބިނާކުރުމުގައި އެމްޓީސީސީން ވަނީ މުހިއްމު ދައުރެއް އަދާކޮށްފައެވެ.

އިތުރު ލިޔުންތައް އެމްޓީސީސީ