ޕާކިސްތާނަކީ "ދުނިޔޭގައި އޮތް އެންމެ ނުރައްކާތެރި އެއް ގައުމު" ކަމަށް އެމެރިކާގެ ރައީސް ޖޯ ބައިޑަން ސިފަ ކުރައްވައިފިއެވެ. އަދި އެކަމާ ގުޅިގެން އިސްލާމްއާބާދުގައި ހުންނަވާ އެމެރިކާގެ ސަފީރަށް އިހުތިޖާޖު ކުރައްވާނެ ކަމަށް ޕާކސްތާންގެ ޚާރިޖީ ވަޒީރު ބިލާވަލް ބުއްޓޫ ޒަރްދާރީ ވަނީ ވިދާޅުވެފައެވެ.
ޖޯ ބައިޑެން ވިދާޅުވީ ޕާކިސްތާނަކީ އެއްވެސް ހަމައެއް ނެތް ނިއުކްލިއަރ ހަތިޔާރު ގެންގުޅޭ ގައުމެއް ކަމަށެވެ.
ބައިޑެން މިވާހަކަތައް ވިދާޅުވެފައި ވަނީ ބުރާސްފަތި ދުވަހު ޑިމޮކްރެޓިކް ޕާޓީގެ ކޮންގްރެސްގެ ކެމްޕޭން ކޮމިޓީގައި ވާހަފުޅު ދައްކަވަމުންނެވެ.
ވައިޓް ހައުސްގެ ވެބްސައިޓުގައި ޝާއިއުކޮށްފައިވާ އެ ޚިޠާބުގެ ޓްރާންސްކްރިޕްޓެއްގައި ބައިޑަންއާ ހަވާލާދީ ބުނެފައިވަނީ، “... އަދި އަޅުގަނޑަށް ހީވާގޮތުން ފަހަރެއްގައި ދުނިޔޭގައި ހުރި އެންމެ ނުރައްކާތެރި އެއް ގައުމު: ޕާކިސްތާން. އެއްވެސް ހަމައެއް ނެތި ނިއުކްލިއާ ހަތިޔާރު ގެން ގުޅޭ ގައުމެއް.” ކަމުގައެވެ.
އެމެރިކާގެ ރައީސް މިހެން ވިދާޅުވީ ދުނިޔޭގެ ފެންވަރުގައި ޖިއޮޕޮލިޓިކަލް ހާލަތު ބަދަލުވަމުންދާ ދަނޑިވަޅެއްގައެވެ. އޭނާ ވިދާޅުވީ ދުނިޔެ ހަލުވިކަމާއެކު ބަދަލުވަމުން އަންނަ ކަމަށާއި ގައުމުތަކުން އިއްތިހާދުތަކާ މެދު އަލުން ވިސްނަމުން އަންނަ ކަމަށެވެ.
ބައިޑެންގެ ވާހަކަތަށް ރައްދު ދެއްވަމުން ޕާކިސްތާންގެ ބޮޑު ވަޒީރު ވިދާޅުވީ ޕާކިސްތާނަކީ ޒިންމާދާރު ނިއުކްލިއާ ބާރެއް ކަމަށެވެ.
