ޕެރިސް ކްލަބްގައި ނުހިމެނޭ ފަރާތްތަކާއި ޗައިނާއަށް ދައްކަންޖެހޭ 27 ބިލިއަން ޑޮލަރުގެ ދަރަނި އަލުން ޝެޑިއުލް ކުރުމަށް އެދިވަޑައިގަންނަވާނެ ކަމަށް ޕާކިސްތާންގެ ފިނޭންސް މިނިސްޓަރު އިސްހާގު ދާރު ވިދާޅުވެއެވެ.
ނަމަވެސް ދަރަނި ރީސްޓްރަކްޗާ ކުރުމުގެ ތެރޭން ރައްޔިތުންނަށް ދަތިވާގޮތަށް އެއްވެސް ކަމަކަށް އެއްބަސްވެ ވަޑައި ނުގަންނަވާނެ ކަމަށް ވިދާޅުވެއެވެ.
ބައިނަލްއަގްވާމީ މީޑިއާއާ ވާހަކަދައްކަވަމުން ދާރް ވަނީ ޕާކިސްތާނުގެ ދަރަނި ޑިފޯލްޓް ވެދާނެ ކަމަށް ދައްކާ ވާހަކަތއް ދޮގު ކުރައްވާފައެވެ. އަދި ޑިސެމްބަރު މަހު ދައްކަންޖެހޭ ބޮންޑްތަކުގެ މެޗުރިޓީ ތާރީހު އިތުރު ކުރުން ނުވަތަ އިންޓަނޭޝަނަލް މަނިޓަރީ ފަންޑާއެކު މިހާރު ކުރިއަށް ގެންދާ ޕްރޮގްރާމް އަލުން ނެގޯޝިއޭޓް ކުރުމުގެ ވާހަކަ އޭނާ ދޮގު ކުރެއްވިއެވެ.
ޕާކިސްތާންގެ ފިނޭންސް މިނިސްޓަރު ވިދާޅުވީ މަލްޓިލޭޓަރަލް ޑިވެލޮޕްމަންޓް ބޭންކުތަކާއި ބައިނަލްއަގްވާމީ އެހީދޭ ފަރާތްތަކުން "ފުދޭވަރަކަށް ޕާކިސްތާނަށް ފްލެކްސިބަލް" ވެފައިވާ ކަމަށާއި ގާތްގަނޑަކަށް 32 ބިލިއަން ޑޮލަރު ޕާކިސްތާނަށް ލިބޭނެ ކަމަށް ދެކެވަޑައިގަންނަވާ ކަމަށެވެ.
ބައިނަލްއަގްވާމީ މާލީ އިދާރާތަކާއި މަޝްވަރާ ކުރުމަށާއި ވޮޝިންޓަންގައި ހިނގާ އައިއެމްއެފްގެ އަހަރީ ބައްދަލުވުމަށް ދާރް މިހާރު ހުންނެވީ ވޮޝިންޓަނުގައެވެ.
