ތާރީހީ ތިންވަނަ ދައުރަކަށް ޗައިނާގެ ރައީސް ޝީ ޖިންޕިންގއަށް ވެރިކަން ދިނުމަށް ރަބަރު ތަތްގަނޑެއް ޖެހުމަށް ބާއްވާ ކޮމިއުނިސްޓް ޕާޓީގެ ކޮންގްރެސް މިއަދު ފަށައިފިއެވެ. މި ކޮންގްރެސް އިފްތިތާޙު ކުރައްވަމުން ޝީ ވަނީ އޭނާގެ ލީޑަޝިޕްގެ ވަށައިގެން އެއްބައިވަންތަކަން އުފެއްދެވުމަށް އެދިވަޑައިގެންފައެވެ.
ބެއިޖިންގެ ގްރޭޓް ހޯލް އޮފް ދަ ޕީޕަލްސްއަށް އެއްވި 2،300 މަންދޫބުންނަށް އިއްވެވި ޚިޠާބުގައި ޝީ ވަނީ އޭނާގެ ގިނަ ސިޔާސަތުތައް ޕްރޮމޯޓްކުރެއްވުމަށް ވާހަކަ ދައްކަވައި އެ ސިޔާސަތުތައް ދިފާއުކުރައްވާފައެވެ. "އެއްބައިވަންތަކަމަކީ ބާރެއް. އަދި ކާމިޔާބީއަށް ބޭނުންވަނީ އެއްބައިވަންތަކަން،" ކުރިއަށް އޮތް ފަސް އަހަރަށް ޕާޓީގެ ލީޑަޝިޕަށް ބޭފުޅަހު އިޚުތިޔާރު ކުރުމަށް ބާއްވާ ކޮންގްރެސްގައި ޝީ ވިދާޅުވިއެވެ.
މި ކޮންގްރެސް ހަފްތާއެއް ވަންދެން ކުރިއަށް ދާނެއެވެ.
ޝީ ވިދާޅުވީ އޭނާގެ ރިއާސަތުގައި 10 އަހަރުގެ ވެރިކަމުގައި އެގައުމު ދުނިޔޭގެ ސުޕަޕަވަރަކަށް ވެފައިވާ ކަމަށެވެ. އަދި ވިދާޅުވީ ޗައިނާގެ ބައިނަލްއަގްވާމީ ނުފޫޒާއި ދުނިޔެއިން ޗައިނާއަށް ޝައުގުވެރިވާ ކަމަށެވެ.
ހަމަ އެއާއެއް ވަރަށް ޗައިނާއަށް އަވަށްތެރިންގެ ފާޑު ކިޔުމާއި ދުނިޔޭގެ ގައުމުތަކުގައި ދަރަނީގެ ދަންތުރައެއް ގެންގޫޅޭ ކަމަށް ބުނެ ގައުމުތަކުން ޗައިނާއަށް ފާޑު ކިޔުންވެސް އަމާޒުވެފައި ވެއެވެ.
