އިންޑިއާގެ ޓާޓާ ގްރޫޕުން ހިންގާ ވިސްޓާރާ އެއަރ އާ އެއަރ އިންޑިއާއާ އެއްކޮށްލުމުގެ މަސައްކަތް ކުރަމުން އަންނަ ކަމަށް ސިންގަޕޫރު އެއާލައިންސް އިން ބުނެފިއެވެ.
ވިސްޓާރާ އެއަރލައިންގެ 51 ޕަސެންޓް ހިއްސާ އޮންނަނީ ޓާޓާ ގްރޫޕްގައެވެ. ބާކީ އޮތް 49 ޕަސެންޓްގެ ޙިއްސާގެ ވެރިފަރާތަކީ ސިންގަޕޫރު އެއަރލައިނެވެ.
ސިންގަޕޫރު އެއަރލައިނުން ނެރުނު ބަޔާނެއްގައި ބުނެފައި ވަނީ ޓާޓާއާއެކު ކުރާ މަޝްވަރާތަކުގައި މިހާރު އޮތް ޕާޓްނަޝިޕް ފުން ކުރުމަށް މަސައްކަތް ކުރަމުންދާ ކަމަށާއި ވިސްޓާރާ އާއި އެއާ އިންޑިއާ އެއްކޮށްލެވޭނެ ގޮތް ބަލަމުންދާ ކަމަށެވެ.
އެއާ އިންޑިއާއާ ވިސްޓާރާ އެއްކޮށްލުމުން އިންޑިގޯއަށް ފަހު، އިންޑިއާގައި ދެވަނައަށް އެންމެ ބޮޑު އެއާލައިން ކަމަށް އެއަރ އިންޑިއާ ވެގެންދާނެއެވެ.
ޓާޓާ ގްރޫޕުން ދަނީ އެ ކުންފުނީގެ އަނެއް އެއާލައިން، އެއާއޭޝިއާ އިންޑިއާ ވެސް އެއާ އިންޑިއާ އެކްސްޕްރެސްއާ އެއްކޮށްލުމަށް މަސައްކަތް ކުރަމުންނެވެ.
މި ދެ އެއަރލައިން ގުޅުވާލުމަށް އިންޑިއާގެ ކޮމްޕެޓިޝަން ކޮމިޝަނުން ވަނީ ހުއްދަ ދީފައެވެ.
