ސައޫދީ ވެރިރަށުގެ ބޯލްވާޑް ރިޔާޒު ސިޓީގައި އޮކްޓޯބަރު 27-28 ވާ ބުރާސްފަތި އަދި ހުކުރު ދުވަހު ހެލޮވީން ފާހަގަ ކުރުމަށް ޚާއްސަ މުނާސަބާއެއް ބާއްވަން ނިންމައިފިއެވެ. މިއީ އެތަނަށް ޒިޔާރަތް ކުރާ މީހުންނަށް ބިރުވެރި ކޮސްޓިއުމް ލައިގެން ތިބުމަށް ހާއްސަކޮށްގެން ބާއްވާ ވީކްންޑް ހޮރޯ އިވެންޓެކެވެ.
ވީކްންޑް ހޮރޯ އިވެންޓަކީ ފެންސީ ކޮސްޓިއުމް ލައިގެން ބިރުވެރި ކްރިއޭޓިވް ޑިޒައިންތައް ދައްކާލުމުގެ އިވެންޓެއް ކަމަށާއި މިފަދަ އިވެންޓްތަކުގައި މަޖާ ކުރުމާއި ޖޯޝުން ފުރިފައިވާ މާހައުލެއް ގާއިމް ކޮށް އެކި ކޮސްޓިއުމްތައް ލައިގެންނާއި މޫނު ފޮރުވައިގެން ތިބުމަށް ޝައުގުވެރިވާ މީހުންނަށް ފުރުސަތު ލިބިގެން ދާނެ ކަމަށް އިންތިޒާމު ކުރާ ފަރާތުން ބުނެއެވެ.
ރިޔާޒު ސިޓީ ބޯލްވާޑް ސަރަހައްދުގައި އެކި ގޮތްގޮތުން މުނިފޫހިފިލުވުމަށް ތިއޭޓަރުތަކާއި ޝޯތަކާއި ގޭމްތަކާއި އެހެނިހެން ތަފާތު ހަރަކާތްތައް ހަފްތާ ބަންދުގައި ކުރިއަށް ގެންދެ އެވެ. ބޯލްވާޑް ރިޔާޒު ސިޓީގައި ކެފޭތަކާއި ރެސްޓޯރެންޓްތަކާއި ފިހާރަތަކާއި ފަޔަރވޯކްސްގެ އިތުރުން ގައުމީ މުނާސަބަތުތައް ފާހަގަކުރުމުގެ އިތުރުން ތިއޭޓަރ ޕާފޯމަންސްތަކާއި ޕާޓީތަކާއި ފެސްޓިވަލްތައް ފަދަ މުނިފޫހިފިލުވުމުގެ ގިނަ ހަރަކާތްތަކެއް ވެސް ކުރިއަށް ގެންދެ އެވެ.
