އަންނަ އަހަރު ރާއްޖޭގައި ބާއްވާ ރިޔާސީ އިންތިޚާބުގައި ކެންޑިޑޭޓަކު ނެރެ އެއިންތިޚާބު ކާމިޔާބު ކުރައްވާނޭ ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) އިން ބުނެފިއެވެ.
އެ ޕާޓީއަށް އެއް އަހަރު ފުރުމާއި އައު އޮފީސް ހުޅުވުމަށް ރޭ ބޭއްވި ޖަލްސާގައި ވާހަކަ ދައްކަވަމުން އެޕާޓީގެ ރައީސް މުހައްމަދު ނާޒިމް ވަނީ އެ ޕާޓީ އުފެއްދީ ކޮންބަޔަކަށްތޯ މީހުން ސުވާލުކުރަމުންދާ ކަމަށެވެ. އޭނާ ވިދާޅުވީ އެޕާޓީ އުފެއްދީ ރާއްޖޭގައި ވެރިކަން ކުރުމަށް ރައްޔިތުންނަށްޓަކައި ކަމަށެވެ.
ނާޒިމް ވިދާޅުވީ ކުރިއަށްއޮތް ދެމަހެއްހާ ދުވަސްތެރޭގައި އެޕާޓީގެ ރިޔާސީ ޕްރައިމަރީ ބާއްވާނޭ ކަމަށެވެ. އެ ޕްރައިމަރީގައި އޭނާ ވާދަކުރައްވާނޭ ކަމަށް ވެސް ވިދާޅުވިއެވެ. ޕްރައިމަރީން އޭނާ ހޮއްވަވައި ރިޔާސީ ޓިކެޓު ދީފި ކަމަށްވާނަމަ 2023 ގެ ކަރުދާހުގައި "އަޅުގަނޑުގެ ނަން އަޅުގަނޑު ލިޔާނަން" ކަމަށް ވެސް ނާޒިމް ވިދާޅުވިއެވެ. އަދި އެއިންތިޚާބުގައި ރާއްޖޭގެ ބޮޑެތި ޕާޓީތަކާ ވެސް ވާދަކުރައްވާނޭ ކަމަށް އޭނާ ވިދާޅުވިއެވެ. "އަޅުގަނޑު މިހުރީ ރައްޔިތުންނަށް ޚިދުމަތް ކުރަން ނުކުމެ،" ކަމަށް ވެސް އޭނާ ވިދާޅުވިއެވެ.
މޯލްޑިވްސް ނެޝަނަލް ޕާޓީގެ އައު އޮފީސް ހުޅުވީ މއ. ކެލާވީ 1 ވަނަ ފަންގިފިލާގައެވެ.
