އިންޑިއާއާއި ޗައިނާ ދެމެދުގެ ގުޅުމާ ބެހެ ގޮތުން އިންޑިއާގައި ހުންނަވާ ޗައިނާ ސަފީރު ވާހަކަ ދައްކަވައިފިއެވެ. ސަފީރު ސަން ވެއިޑޮންގް ވަނީ އޭނާގެ ދައުރު ހަމަކުރައްވައި އިންޑިއާއިން ފުރައި ވަޑައިގަތުމުގެ ކުރިން މީޑިއާއާ ބައްދަލު ކުރައްވާފައެވެ.
ވަދާއީ ބަޔާނުގައި ސަފީރު ވިދާޅުވީ އިންޑިއާއާއި ޗައިނާއިން އެއް ބަޔަކު އަނެއް ބަޔަކާ ނުތޮޅި އުޅެވޭ ވަރަށް ދެ ގައުމަށްވެސް ފުރުސަތުތައް އެބައޮތް ކަމަށެވެ. އަދި "ޖިއޮޕޮލިޓިކްސްގެ ދަންތުރައިން" ދެ ގައުމު ނިކުތުމަށް އޭނާ ގޮވާލެއްވިއެވެ.
ދެގައުމުގެ ރައްޔިތުންނަށް ސުލްހަވެރިކަމާއެކު އުޅެވޭނެ ގޮތެއް ހޯދައި، ދެފަރާތަށްވެސް މޮޅުވާ ގޮތަށް އެއްބާރު ކުން އިތުރު ކުރުމަށް އޭނާ ގޮވާލެއްވިއެވެ.
ސަން އިތުރަށް ތަފްސީލުކޮށް ދެއްވަމުން ވިދާޅުވީ ޗައިނާއާއި އިންޑިއާގެ ގުޅުމަށް ހުޅަނގުގެ ޖިއޮޕޮލިޓިކްސްގެ ތިއަރީ ތަންފީޒު ކުރުމަކީ ފައިދާ ހުރި ކަމެއް ނޫން ކަމަށެވެ. އަދި އެ ތިއަރީތައް ބޭނުން ކޯށްފިނަމަ އެއްބަޔަކު އަނެއް ބަޔަކަށް ނުރައްކަލާއި ވާދަވެރިންގެ ގޮތުގައި ކުރިމަތިލާން ޖެހިދާނެ ކަމަށެވެ.
