މި އަހަރުގެ ނަސްރުގެ ދުވަސް (ނޮވެމްބަރ 3) ނަމެއްގައި އެއްވެސް ފަރާތަކުން ފާހަގަ ކުރުމުގެ ބޭނުމެއްނެތް ކަމަށް ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
އުމަރު ވިދާޅުވީ 1988 ވަނަ އަހަރު ނޮވެމްބަރ 3 ވަނަ ދުވަހު ރާއްޖެއަށް ކުރިމަތިވި އުުދުވާނީ ހަމަލާއަކީ ފަހުގެ ތާރީޚެއްގައި ރާއްޖެއަށް ކުރިމަތިވި އެންމެ ނުރައްކާތެރި ހާދިސާ ކަމަށެވެ. އެދުވަސް ނަސްރުގެ ދުވަހުގެ ގޮތުގައި ފާހަގަކުރަންވާނީ ނަމެއްގައި ނޫން ކަމަށާއި އެކަން އަމަލީ ގޮތުން ވެސް ދައްކަން ޖެހޭނޭ ކަމަށް ވިދާޅުވިއެވެ.
"އެކަން އަމަލީ ގޮތުން ދެއްކޭނީ ވެރިންނާއި ރައްޔިތުން ގުޅި އެއްބަހެއް ކިޔައިގެން. މުޖުތަމައުގައި ހުރި މައްސަލަތައް ހައްލުކޮށް ގައުމާގެން ކުރިއަށްދާނޭ ހަރުދަނާ ޒުވާނުންތަކެއް އުފައްދައިގެން. ގައުމުދިފާއުކުރާނޭ ލީޑަރުންތަކެއް ބިނާކޮށްގެން. ވައްކަމާއި ޑްރަގާއި މާރާމާރީއާާއިި އަނިޔާވެރިކަން ގައުމުން ހުއްޓުވައިގެން. މިކަންކަން ކުރެވޭނީ ހަރުދަނާ ގަޓްހުރި ވެރިންތަކެެއް އިންތިޚާބުކޮށްގެން. އިންތިޚާބު ކުރެވޭ ވެރިޔާ ވާންވާނީ ގައުމު ނުވިއްކާ ރައްޔިތުންނަށް ހަގީގަތުގައިވެސް ހެޔޮއެދޭ މީހަކަށް،" އުމަރު ވިދާޅުވިއެވެ.
މިއަހަރުގެ ނަސްރުގެ ދުވަސް ފާހަގަ ކުރުުމަށް އުމަރު އިސްވެ ހުންނަވައިގެން ބާއްވާ ޖަލްސާއެއް ނޮވެމްނަރު 3 ވަނަ ދުވަހުގެރޭ 9:00 ގައި ސަލްޓަންޕާކުގައި އޮންނާނެއެވެ. އުމަރު ވިދާޅުވީ އެ ޖަލްސާ ބާއްވާ ތަނުގައި 500 ގޮނޑި އަތުރާނޭ ކަމަށެވެ. މި ޖަލްސާގައި ބައިވެރިވުމުގެ ފުރުސަތު އާންމުކޮށް ވަނީ ހުޅުވާލައިފައެވެ. "އެއްވެސް ބޭފުޅަކަށް ޚާއްސަ ދައުވަތެއް ނުދެން. މިއީ ގައުމީކަމެއް. ގައުމީކަމެއްގައި ޚާއްސަ ދައުވަތެއް ދިނުމުގެ ބަދަލުގައި ހުޅުވިފައިވާ ދައުވަތެއް ދިނުމަކީ އެންމެ ރަނގަޅު ގޮތް ކަމަށް ފެންނާތީ އެގޮތަށް ހެދީ،" އުމަރު ވިދާޅުވިއެވެ.
މިއީ އުމަރު އިސްވެ ހުންނަވައިގެން ނަސްރުގެ ދުވަސް ފާހަގަކުރައްވާ ފަސް ވަނަ ފަހަރެވެ. އުމަރަކީ ކުރިއަށްއޮތް ރިޔާސީ އިންތިޚާބުގައި އަމިއްލަ ގޮތުން ވާދާކުރައްވާނޭ ކަމަށް އިއުލާން ކުރައްވާފައިވާ މިނިވަން ކެންޑިޑޭޓެކެވެ. މިހާރުވެސް އޭނާ ގެންދަވަނީ ކެންޕޭނުގެ މަސައްކަތް އެކި ސިފަސިފާގައި ކުރައްވަމުންނެވެ.
