ޗާގޮސް މައްސަލާގައި ސިޔާސީ ޕާޓީތަކާ މަޝްވަރާ ކުރުމަށް އެދޭ ކަމަށް ބުނެ މޯލްޑިވްސް ނެޝަނަލް ޕާޓީ (އެމްއެންޕީ) އިން ރައީސް އިބްރާހީމް މުހައްމަދު ސާލިހަށް ސިޓީއެއް ފޮނުވައިފިއެވެ.
އެޕާޓީން އެގޮތަށް ސިޓީއެއް ފޮނުވީ އެ މައްސަލާގައި އެކިގޮތަށް ވާހަކަ ދެކެެވުމުންދާތީއެވެ. ސަރުކާރުން އެ މައްސަލާގައި ސަރުކާރުން ނިންމާފައިވަނީ މޮރިޝަސްއާ އެއްކޮޅަށް ވޯޓު ދިނުމަށް ކަމަށް އެނގިފައިވެެއެވެ. އެހެނަސް ސަރުކާރުން ކުރިން އެމައްސަލާގައި ވޯޓުދިނީ މޮރިޝަސްއާ ދެކޮޅަށެވެ. ސަރުކާރުގެ ސްޓޭންޑް ބަދަލުވީ އިންޑިއާގެެ ނުފޫޒުން ކަމަށް ސިޔާސީ ބައެއް ފަރާތްތަކުން ވަނީ ތުހުމަތު ކޮށްފައެވެ. އެހެނަސް ރައީސްއޮފީހުން ވިދާޅުވެފައިވަަނީ އެކަމުގައި އެއްވެސް ގައުމެއްގެ ނުފޫޒެއް ނެތްކަމަށެވެ. ރާއްޖެއިން މޮރިޝަސްއާ އެއްކޮޅަށް ވޯޓުދޭން ނިންމީ ޗާގޮސްގެ މިނިވަންކަމާ ގުޅޭގޮތުން ކަމަށާއި އިމުގެ މައްސަލާގައި ނޫންކަމަށް ސަރުކާރުން ވަނީ ބުނެފައެވެ.
އެމްއެންޕީން ބުނެފައިވަނީ މިމައްސަލާގައި ސަރުކާރުން އަމަލުކުރާނޭ ގޮތެއް ވަރަށް ސާފުކޮށް ރައްޔިތުންނަށް އެނގެންޖެހޭނޭ ކަމަށެވެ. އެއީ އެ މައްސަލާގައި އެކިސަރުކާރުތަކުން އެކިގޮތަށް އަމަލުކޮށްފައިވާތީ ކަމަށް ވެސް އެމްއެންޕީން ބުނެއެވެ. މިވަގުތަކީ ގައުމީ މަސްލަހަތު ވަރަށް ބޮޑަށް އިސްކުރަންޖެހޭ ވަގުތެެއް ކަމަށް ވެސް އެޕާޓީން ބުނެފައިވެއެވެ.
މި މައްސަލާގައި އެޕާޓީން ކުރީން ބުނެފައިވަނީ ރާއްޖޭގެ އެއްގަމާއި ކަނޑާއި އެހެނިހެންވެސް ސަރަހައްދަކުން އެންމެެ އިންޗިއެއް ވެސް ދޫކުރަން ތާއީދެއް ނުކުރާނޭ ކަމަށެވެ. އެހެންކަމުން މި މައްސަލާގައި ސަރުކާރުން ގައުމީ މަސްލަހަތު އިސްކުރަން ޖެހޭ ކަމަށް އެމްއެންޕީން ބުނެފައިވެއެވެ.
