ސައުދީ އަރަބިއާގައި ބޭއްވި ވޯލްޑް ފެސްޓިވަލަށް ރާއްޖޭގެ ވިޔަފާރިވެރިޔާ އުމަރު ނަސީރުގެ ވޭލް ސަމްބެރިން ގެންދަން ފޯނުން މަޝްވަރާ ކުރެވުނު ގޮތަށް ސަބްމެރީން ގެންދާނެ ބޯޓެއް ލިބިފައިނުވާތީ ޔޫއޭއީގެ އެވެންޓަސް ގްރޫޕަށް އެއްކޮށް ފައިސާ ދައްކަންނުޖެހި ސަލާމަތްވާނޭ ކަމަށް ވޭލް ސަމްބެރިން ކުންފުނީގެ ވެރިޔާ އުމަރު ނަސީރު ވިދާޅުވެއްޖެއެވެ.
ޔޫއޭއީގެ ކުންފުނީން އެމައްސަލަ ސިވިލްކޯޓަށް ހުށަހެޅުމުން އެކޯޓުން ވަނީ 7.7 މިލިއަން ރުފިޔާ އެކުންފުންޏަށް ދައްކަންޖެހޭ ކަމަށް ނިންމައި ވޭލްސަބްމެރީން ކުންފުންޏާ ދެކޮޅަށް ހުކުމް ކުރައްވައިފައެވެ. މި ފައިސާ ދެމަސްތެރޭގައި ދައްކަން ޖެހެއެވެ.
މި ކަމާ ގުޅިގެން އުމަރު ނަސީރު ވިދާޅުވީ އެފައިސާ ދައްކަން ނުޖެހޭނޭ ކަމަށެވެ. "ނުޖެހޭނެ އެފައިސާ އެއްކޮށް ދައްކާކަށް. ހައިކޯޓުން ނުވަތަ ސުޕްރީމް ކޯޓުން ވިން ކުރެވޭނެ،" އުމަރު ވިދާޅުވިއެވެ.
މި އެއްބަސްވުމަކީ ޔޫއޭއީގެ އެވެންޓަސް ގްރޫޕާއި ވޭލް ސަމްބެރިން ކުންފުންޏާ އެކު ފޯނުންވީ އެއްބަސްވުމެކެވެ. އެ މަޝްވަރާގައި ބުނާގޮތުން 2019 ވަނަ އަހަރު ސައުދީގެ ޖިއްދާގައި ބޭއްވި ވޯލްޑް ފެސްޓިވަލަށް ވޭލް ސަބްމެރިން ގެންދަން ޖެހެއެވެ. އެހެނަސް އެ ފެސްޓިވަލަށް ސަބްމެރީން ގެންދެވިފައެއް ނުވެއެވެ. އެއްބަސްވެފައިވާ ތާރީޚަށް ސަބްމެރިން ނުގެންދެވުނީ ސަބްމެރިން ޖިއްދާއަށް ގެންދާނެ ބޯޓެއް ނުލިބުމުގެ ސަބަބުން ކަމަށް އުމަރުވަނީ ވިދާޅުވެފައިވެއެވެ. އަދި އެކަން އެގޮތަށް ދިމާވެދާނޭކަމަށް ކުރިން ވެސް އަންގާފައިވާނޭ ކަމަށް އޭނާ ވިދާޅުވިއެވެ.
