މޯލްޑިވްސް ނެޝަނަލްޕާޓީ (އެމްއެންޕީ) ގެ ރިޔާސީ ޕްރައިމަރީ އަންނަ އަހަރުގެ ޖެނުއަރީމަހު 14 ވަނަ ދުވަހު ބާއްވާ ގޮތަށް ނިންމައިފިއެވެ. މި ގޮތަށް ނިންމެވީ އެ ޕާޓީގެ ގައުމީ ހިންގާ ކައުންސިލްގެ ފުރަތަމަ ބައްދަލުވުމުންނެވެ.
އެ ބައްދަލުވުމުން ނިންމާފައިވަނީ ރިޔާސީޕްރައިމަރީ އަންނަ ޑިސެންބަރު 1 ގައި އިއުލާން ކުރާ ގޮތަށެވެ. އެޕާޓީގެ ރައީސް މުހައްމަދު ނާޒިމް މީގެ ކުރިން ވަނީ ރިޔާސީ ޕްރައިމަރީގައި ވާދަކުރައްވާނޭ ކަމަށް ވިދާޅުވެފައެވެ. އަދި މެމްބަރުން އޭނާއަށް ރިޔާސީ ޓިކެޓު ދީފި ކަމަށްވާނަމަ ރިޔާސީ އިންތިޚާބުގައި ވާދަކޮށް ކާމިޔާބު ކުރައްވާނޭ ކަމަށް ވެސް ވިދާޅުވިއެވެ. ނާޒިމް ވިދާޅުވެފައިވަނީ އެ ޕާޓީ އުފެއްދީ ރައްޔިތުންނަށް ޚިދުމަތް ކުރެއްވުމަށް ކަމަށެވެ. އެހެން ކަމުން އަބަދުވެސް ރައްޔިތުންގެ ޚިދުމަތުގައި ދެމިތިބޭނޭ ކަމަށް ވިދާޅުވިއެވެ.
އެ ބައްދަލުވުމުގައި ނިންމުނު އެންމެ މުހިންމު ކަމަކީ ސިޔާސީ މައިދާނުގައި ޕާޓީގެ ސްޓޭންޑް ކަނޑައެޅުމެވެ. އެގޮތުން ޕާޓީގެ ނާއިބު ރައީސް އަޙްމަދު ޝަރީފް ހުށަހަޅުއްވީ އެމްއެންޕީން އިދިކޮޅު ޕާޓީއެއްގެ ގޮތުގައި، ސަރުކާރު ޒިންމާދާރުކުރުވާ ޕާޓީގެއެއްގެ ގޮތުގައި އޮތުމަށެވެ. މިހުށަހެޅުމަށް ތާޢީދުކުރެއްވީ ނާއިބު ރައީސް ޙުސައިން އިސްމާޢީލެވެ. މިހުށަހެޅުމަށް ކުރެވުނު ބަހުސްގައި ގިނަ މެންބަރުން ފާހަގަކުރެއްވީ ރައްޔިތުންނަށް މަންފާހުރި ކަންކަމަށް ސަރުކާރުން އެންމެ އެކަށީގެންވާ އިޖާބަ ނުދޭކަމަށެވެ. ރައްޔިތުންގެ ކަންބޮޑުވުންތަކަށް ޖަވާބުދާރީ ނުވާ ކަމަށެވެ. އޭގެ އިތުރުން ރައްޔިތުންގެ މަޖިލީހުގައި ރައްޔިތުންގެ ހައްގުގައި ކުރާ މަސައްކަތްތަކަށް އެއްބާރުލުންވެސް ނުލިބޭކަމުގައެވެ. މިހުށަހެޅުމަށް ހާޒިރުވެވަޑައިގެން ތިއްބެވި ހުރިހާ ބޭފުޅުންގެ އިއްތިފާގުން ވަނީ ފާސްކޮށްފައެވެ.
އެމްއެންޕީ އޮފީހުގެ ކޮންފަރެންސް ރޫމްގައި ބޭއްވި ބައްދަލުވުމުގައި ޕާޓީގެ ޤައުމީ ހިންގާ ކައުންސިލްގެ 52 މެންބަރުން ވަނީ ބައިވެރިވެފައެވެ. އޭގެ ތެރޭގައި ރާއްޖޭގެ އެކި ކަންކޮޅުތަކުން އޮންލައިންކޮށް ބައިވެރިވި ގިނަ މެންބަރުންވެސް ހިމެނެއެވެ.
