ރާއްޖޭގެ ރައީސުލްޖުމްހޫރިއްޔާ ކަމަށް ވަޑައިގަންނަވަނީ ރައްޔިތުންނަށް އިޚްލާސްތެރި ޚިދުމަތެއް ކޮށްދެއްވަން ހެޔޮ ނިޔަތަކާއެކު ކަމަށް ކުރީގެ ހޯމް މިނިސްޓަރ އުމަރު ނަސީރު ވިދާޅުވެއްޖެއެވެ.
އޭނާ ވިދާޅުވީ ރާއްޖެއަށް މިވަގުތު ބޭނުންވަނީ ކެރިގެން ކަންކަމަށް ކުރިމަތިލައްވާނޭ ވެރިއެއް ކަމަށެވެ. އިޚްލާސްތެރިކަމާއެކު ޚިދުމަތްކޮށްދެއްވާނޭ ލީޑަރެއް ކަމަށެވެ.
"އިޚްލާސްތެރި ކަމާއެކީ ކެރިގެން ޚިދުމަތް ކުރަން ނިކުންނަ ވެރިއަކު އެންމެ އިސްކަންދޭނީ ރައްޔިތުންގެ ހަމަޖެހުމާއި އިންސާފަށް. އަޅުގަނޑުގެ ވެރިކަމެއްގައި ރައްޔިތުންނަށްޓަކައި އަޅުގަނޑު އުފާތައް އެއްފަރާތް ކުރާނަން. ރައްޔިތުންނަށް ސުލްހަވެރި އަމާން ވެއްޓެއް ގާއިމްކޮށްދޭނަން. މިކަންކަން ކުރެވޭނީ ވަރަށް ބުރަކޮށް ހީވާގި ކަމާއެކު މަސައްކަތް ކުރެވިގެން،" އުމަރު ވިދާޅުވިއެވެ.
އޭނާ ވިދާޅުވީ ރައްޔިތުންނަށް ވެރިކަން ކޮށްދެއްވުމުގެ ފުރުސަތު ދީފި ކަމަށްވާނަމަ އެކަންކުރައްވަން ވަޑައިގަންނަވާނީ "ހުދުވަލެއްގައި" ހިއްޕަވައިގެން ކަމަށެވެ. "އަޅުގަޑު ވަޒީރުކަން ކުރީ ހުދު ވަލެއްގައި ހިފައިގެން. ﷲ ގެ ވާގިފުޅާއެކު، އަޅުގަޑު ރައީސުލް ޖުމްހޫރިއްޔާގެ މަގާމް އަދާކުރާނީވެސް ހަމަ މިދެންނެވި ހުދުވަލުގައި ހިފައިގެން،" މީގެ ކުރިން އޭނާ ވިދާޅުވެފައިވެއެވެ.
އުމަރު ވިދާޅުވީ އޭނާއަށް ރާއްޖޭގެ ވެރިކަން ހަވާލުކޮށްފިނަމަ ދިވެހީން ދުވަހުކެވެސް ނުދެކޭފަދަ ހަރުދަނާ، ހެޔޮލަފާ، ސާފު ވެރިކަމެއް ﷲއިރާދަފުޅާއެކު ކޮށްދެއްވާނޭ ކަމަށެވެ. ރައްޔިތުން ބޭނުންވާ ހެޔޮ މިސްރާބަކަށް ރާއްޖެ ގެންގޮސްދީ އިސްލާމްދީނާ ރައްޓެހި ރައްޔިތެއް ދިރިއުޅޭ ތަނަކަށް ގައުމު ހައްދަވާނޭ ކަމަށް ވިދާޅުވިއެވެ.
މިކަން މިގޮތަށް ކުރައްވާނޭކަން މިސަރުކާރަށް އެނގިވަޑައިގަންނަވާ ކަމަށާއި އެހެންވެ އަންނައަހަރުގެ ރިޔާސީ އިންތިޚާބުގައި "އަޅުގަޑު ބައިވެރިވިޔަ ނުދިނުމަށް މި ސަރުކާރުން ކުރޭ. އެކަމަކު އެކަން ކާމިޔާބެއް ނުވާނެ،" ކަމަށް އޭނާ ވިދާޅުވިއެވެ.
އުމަރު ވިދާޅުވީ އޭނާގެ ވެރިކަމެއްގައި ރާއްޖެއިން ޑްރަގް ނައްތާލައްވާނޭ ކަމަށެވެ. އަދި މަސްތުވާތަކެތި ރާއްޖެއަށް އެތެރެވާ ހުރިހާ ދޮރުތަކެއް ހޯދައިބަލައި އެދޮރުތައް ބަންދު ކުރައްވާނޭ ކަމަށް ވެސް ވިދާޅުވިއެވެ. ރާއްޖޭގައި ކުށްކުރާ މީހުންނާމެދު އެކަށީގެންވާ ގޮތަށް ގާނޫނީ ފިޔަވަޅު އަޅައި މާރާމާރީއާއި އެހެނިގެން ކުށްކުރުން ހުއްޓުވާނޭ ކަމަށް ވެސް އޭނާ ވިދާޅުވިއެވެ. މިއާއެކު ރައްޔިތުންނަށް ބޭނުންވާ އަސާސީ ޚިދުމަތްތަކާއި އުމްރާނީ ތަރައްގީވެސް މެކުހަށް ޖައްސަވާލައްވާނޭ ކަމަށް ވިދާޅުވިއެވެ.
