ހަމަހަމަ ކަމުގެ ވާހަކައާއި ހައްގުތަކުގެ ވާހަކަ ހަމަހަމައަށް ލިބެންޖެހޭ ކަމުގެ ވާހަކަ ދައްކާތާ ލައްކަ ޒަމާންވެއްޖެއެވެ.
އަންހެނުންނާއި ފިރިހެނުންގެ ހަމަހަމަ ކަމުގެ ވާހަކައެއެވެ. މުއްސަނދިންނާއި ފަގީރުންގެ ހަމަހަމަ ކަމުގެ ވާހަކައެވެ. ޚިދުމަތް ދިނުމުގައި ގެންގުޅެންޖެހޭ ހަމަހަމަ ކަމުގެ ވާހަކައެވެ. ޤާނޫނުގެ ކުރިމަތީގައި އެންމެން ހަމަހަމަ ކަމުގެ ވާހަކައެވެ. ޖުމްލަކޮށް ހުރިހާ ކަމެއްގައި ވެސް ހަމަހަމަ ކަމުގެ ވާހަކައެވެ.
ހަމަހަމަ ކަމަކީ ވާހަކަ ދައްކައިގެން އަދި ކަރުދާހުގައި ލިޔެގެން އެހާ ލުއިކޮށް ނަގައިގެން ކުރެވޭނެ ކަމެއްނޫނެވެ. ހަމަހަމަކަމަކީ ދެ މިޔަ ލީ ކަނޑިއެއް ފަދަ އެއްޗެކެވެ. އިންސާފުވެރިކަމާއެކު ހަމަހަމަކަން ގެންގުޅުމަކީ ފަސޭހަ ކަމަކަށް ނުވެދާނެއެވެ. އެހެންނަމަވެސް ހަމަހަމަ ކުރަންޏާ ވާހަކަ ދެއްކުމުގެ ބަދަލުގައި އިންސާފުވެރިކަމާއެކު އެންމެން ހަމަހަމަ ކުރަންޖެހޭނެއެވެ.
އެންމެންނަކީ ހަމަހަމަ ބައެއްކަމަށް ބުނުމަކުން ހަމަހަމައެއް ނުވެއެވެ. ހަމަހަމަކުރުމަށް މަސައްކަތްތަކެއް ކުރަންޖެހެއެވެ. ބައެއްކަހަލަ ސަގާފަތްތަކަށް ބަދަލު ގެންނަން ޖެހެއެވެ. ހައްގުތަކެއް ކަށަވަރު ކޮށްދޭންޖެހެއެވެ.މުޖުތަމައު އެކުލެވިގެންވާ އެކިއެކި ގިންތިތަކުގައި ހިމެނޭ އެންމެންނަށްވެސް ހަމަހަމަ ހައްގުތަކެއް ލިބިދޭންޖެހެއެވެ. މިސާލަކަށް އަންހެނުންނާއި ފިރިހެނުންނަކީ އެއިން ކޮންމެ ޖިންސަކަށް ވެސް ތަފާތު ކުރުމެއް ނެތި ހައްގުތަކެއް ލިބެންޖެހޭނެ ބައެކެވެ. ސަގާފަތުގައިވާ ބައެއް ކަންކަމުގެ ސަބަބުން، އޭގެ ތެރެއިން އެއްބައި މީހުންނަށް ނިކަމެތިކަމެއް ލިބެމުން ދާނަމަ، އެއީ ބަދަލުކުރަންޖެހޭ ސަގާފަތެއްކަން ޔަގީނެވެ.
ހަމަހަމަ ކަމާ މެދު އިތުރަށް ވިސްނާލައިފިނަމަ، އެއީ އެހާ ސާފު، އަދި ލުއިކޮށް ނަގައިގެންވާނެ ކަމެއްނޫންކަން ހާމަވެގެންދެއެވެ. މިސާލަކަށް، މުޖުތަމައުގައި ތަފާތު އުފެދިފައިވާ ބައިބައިގެ މީހުން، ހަމަހަމަކުރަންވީ އެންމެންނަށް އެއްވަރަކަށް ހައްގުތަކާއި އެކިއެކި އިނާޔަތްތައް ފޯރޮކޮށްދީގެންބާވައެވެ؟ ނުވަތަ މުޖުތަމައުގެ ތަފާތު އުފެދިފައިވާ ބައިބައިގެ މީހުންގެ ހާލަތު ދެނެގަތުމަށްފަހު، ކޮންމެ މީހަކަށްވެސް އެމީހަކަށް އެންމެ އެކަށީގެންވާވަރަށް އެކިއެކި ކަންކަން ފޯރުކޮށްދީގެން، ހަމަހަމަ އަމާޒަކަށް ދަތުރުކޮށްގެން ހަމަހަމަކަން ގާއިމުކުރަންވީބާވައެވެ؟ ފުރަތަމަ ގޮތަކީ އެންމެންވެސް ތިބީ ފަށާރޮނގެއްގައި ކަމަށް ބަލާފައި ކުރިޔަށް ދާން ފެށުމާ އެއްފަދަ ކަމެކެވެ. ދެވަނަ ގޮތަކީ އެންމެންވެސް އެތިބިތަނަކުން ނިންމާ ރޮނގާ ހަމައަށް އެކުގައި ގެންދިއުންފަދަ ކަމެކެވެ.
މި ދެގޮތަކީވެސް ހަމަހަމަކަން ގާއިމު ކުރެވިއްޖެ ކަމަށް ބުނެވޭނެ ދެގޮތެވެ.ނަމަވެސް އެންމެނަށް އެއްވަރަކަށް ހައްގުތަކާއި އިނާޔަތްތައް ދީގެން ހަމަހަމަކަން ގާއިމުކޮށްފިނަމަ، އެއީ ހަމައެކަނި ކަރުދާހުގައި ނުވަތަ ރިޕޯޓެއްގައިވާ ތަފާސްހިސާބުތައް ނަލަކޮށްލެވޭނެ ކަމެކެވެ. ހަމަހަމަކަން ލިބިދީފީމޭ ބުނާހާ އަވަހަށް އެ ހަމަހަމަކަން ގެއްލިދާނެއެވެ. ސަބަބަކީ، އެންމެނަށް އެއްވަރަކަށް އެއްޗެއް ދޭންފަށައިފިނަމަ، ނިކަމެތި މީހާ އަބަދުވެސް ހުންނާނީ ތަނަވަސްމީހާއާ އެއް ދުރުމިނެއްގައެވެ. ނުވަތަ އެ ދެމެދުގެ ފަރަގު ދާނީ ފުޅާވަމުންނެވެ.
މުއްސަނދިން އިތުރަށް މުއްސަނދި ވާނެއެވެ. މުއްސަނދިންނަށް މުޖުތަމައުގެ ފަރާތުން ދައްކާ އަގު ވާނީ އެ މީހުނަށް ކޮންމެހެން ބޭނުންނުވާ ހަރަދަކަށެވެ. ނަމަވެސް އޭގެ ފައިދާ އެމީހުނަށް ލިބޭނެއެވެ. އެއާ ހިލާފަށް، ނިކަމެތިންނަށް ލިބޭނީ އަސާސީ ކަންކަން ފުއްދުމުގެ ފުރުސަތެކެވެ.
ވީމާ، މާލީ ފައިދާ ކަމުގައިވިޔަސް، ނުވަތަ އެހެނިހެން ގޮތް ގޮތުން ލިބޭ ފުރުސަތުތަކެއްގެ ފައިދާ ވިޔަސް، ހުރިހާ އެންމެން އެއްވަރު، ހަމަހަމަ މުޖުތަމައުއެއް ގާއިމުކުރެވޭނީ އެކި މީހުނަށް އެކި ގޮތަށް ހިތައިގެންނެވެ. ތަފާތުކޮށްގެންނެވެ. އެހެންނަމަވެސް އޭގެ މާނައަކީ ތަފާތުކުރުމަކީ ރަނގަޅުކަމެކޭނޫނެވެ.
ހަމަހަމަކަން ގާއިމުކުރުމަށް ކުރެވޭ ތަފާތުކުރުން ވާންޖެހޭނީ ވަރަށް ބޮޑަށް ދިރާސާކުރެވި، ބެލެހެއްޓިނިވި މާހައުލެއްގައި، ކޮންޓްރޯލުކުރެވިފައިވާ ކަމަކަށެވެ. ވަކިން ހާއްސަކޮށް، އެފަދަ ތަފާތުކުރުމުގެ ސަބަބުން އެއްވެސް މީހަކަށް އެއްވެސް ކަހަލަ ގެއްލުމެއް ލިބިގެން ނުވާނެއެވެ.
