ދިވެހި ގައުމިއްޔަތު އަންނަނީ ފަނޑުވެ ނެތެމުން ކަމަށް މޯލްޑިވްސް ނެޝަނަލް ޕާޓީ (އެމްއެންޕީ) އިން ބުނެފިއެވެ.
އެޕާޓީގެ ސްޕޯކްސް ޕާސަން ޝިދާތާ ޝަރީފް ވިދާޅުވީ އެއީ ދިވެއްސެއްގެ ހައިސިއްޔަތުން ދެރަވެ ހިތާމަކުރާ ކަމެއް ކަމެއްކަމަށެވެ. އަދި އެކަމާ އެމްއެންޕީއާއި ޕާޓީގެ ލީޑަރު މުހައްމަދު ނާޒިމް ވެސް ކަންބޮޑުވެ ވަޑައިގަންނަވާ ކަމަށް ވިދާޅުވިއެވެ.
ނާޒިމްގެ ވެރިކަމެއްގައި ނުވަތަ އެމްއެންޕީގެ ވެރިކަމެއްގައި ގައުމިއްޔަތު ދިރުވައި އާލާކުރުމަށްޓަކައި އެމްއެންޕީން މަސައްކަތްތަކެއް ކުރައްވާނޭ ކަމަށް ޝިދާތާ ވިދާޅުވިއެވެ. އެގޮތުން ކުޑަކުދިންގެ ހިތްތަކުގައި ގައުމާއި ދީނަށް ލޯބި ޖެއްސުމާއި ދިވެހި ގައުމީ ދިދައަށް ދޭންޖެހޭ ގަދަރާއި އިއްޒަތް ބުނެދީ ރަނގަޅު ޖީލެއް ބިނާކުރުމަށް މަސައްކަތްތަކެއް ކުރާނޭ ކަމަށް އޭނާ ވިދާޅުވިއެވެ.
"ދިވެހީންނަކީ އެއްބަހަކުން ވާހަކަދައްކާ ބައެއްކޭ، އެއްދީނަކަށް ތަބާވާ ބައެކޭ ކިޔައިގެން މިއަދަކު ފަރުޖެއްސޭކަށްނެތް. މިއީ މިކަންކަން އަމަލީގޮތުން ކުރަންވީ ވަގުތު. މިއީ އަޅުގަނޑުމެންގެ ޅަދަރިންގެ ހިތްތަކުގައި މިކަންކަމަށް ޝައުގުވެރިކަން އުފައްދައި އަމަލުކުރަން ދަސްކޮށްދޭންޖެހޭ ވަގުތު. ޑިމޮކްރަސީގެ ތެރެއިން ލިބިފައިވާ މިނިވަންކަން ބޭނުންކޮށްގެން ގައުމިއްޔަތާއި ދީނާއި ސަގާފަތް އޮޔާދާން ދޫކޮށްލެވޭކަށްނެތް. މިކަންކަން ހައްލުކޮށްދެއްވާނީ އަޅުގަނޑުމެންގެ ލީޑަރ ކާނަލް ނާޒިމް އިރާދަކުރެއްވިއްޔާ،" ޝިދާތާ ވިދާޅުވިއެވެ.
އޭނާ ވިދާޅުވީ ރާއްޖެ ތަރައްގީ ކުރުމާއި ރައްޔަތުންނަށް ބޭނުންވާ އަސާސީ ޚިދުމަތްތައް ފޯރުކޮށްދެއްވާނީ ގައުމީވަންތަކަމާއި އެ ރޫހުގައި ކަމަށެވެ. ދިވެހީންނަކީ އެއްބައިވަންތަ އަދި އެއްބައެއްކަން އެމްއެންޕީން އަމަލީ ގޮތުން ބުނެދޭނޭ ކަމަށް ވެސް ޝިދާތާ ވިދާޅުވިއެވެ.
ކުރިއަށްއޮތް ރިޔާސީ އިންތިޚާބުގައި އެމްއެންޕީން ވަނީ ވާދަކުރަން ނިންމައިފައެވެ. އެޕާޓީގެ ރިޔާސީ ޕްރައިމަރީގައި ވާދަކުރައްވާނޭ ކަމަށް އެޕާޓީގެ ލީޑަރު މުހައްމަދު ނާޒިމް ވަނީ ވިދާޅުވެފައެވެ.
