ޑްރަގް ވަންނަ ދޮރުތައް ދަނީ ގިނަވަމުން ކަމަށް މަޑުއްވަރީ ދާއިރާގެ މެމްބަރު އަދި ޕީއެންސީގެ ނައިބް ރައީސް އާދަމް ޝަރީފް އުމަރު ވިދާޅުވެއްޖެއެވެ.
އާދަމް ޝަރީފް މިހެން ވިދާޅުވީ އިއްޔެ މާލޭގައި ފުލުހުން ހިންގި އޮޕަރޭޝަނެއްގައި 71 ކިލޯގެ މަސްތުވާތަކެތި ހޯދައި 10 މީހަކު ހައްޔަރުކުރުމާ ގުޅިގެންނެވެ.
މިއަދުގެ އޮޕަރޭޝަނަށް އިޝާރާތް ކުރައްވައި އާދަމް ޝަރީފް ކުރެއްވި ޓްވީޓެއްގައި ވިދާޅުވީ ޑްރަގުގެ ކުށުގައި ހިފޭ ބައެއް މީހުން ވަރަށް ފަސޭހައިން މިނިވަންވާ ކަމަށާއި އެއީ ޑީލު ހަދައިގެން ކަމަށެވެ. އަދި މިހެންވުމުން ޑްރަގު ވަންނަ ދޮރުތައް ގިނަވަމުންދާ ކަމަށް އޭނާ ވިދާޅުވިއެވެ.
"މުޖުތަމައު އާއި އާއިލާ ޑްރަގުގެ ވަބާއިން ސަލާމަތް ކުރެވޭނީ ހަރުކަށި ފިޔަވަޅު އެޅި، ގާނޫނު ތަންފީޒުކޮށްގެން" އާދަމް ޝަރީފް ވިދާޅުވިއެވެ.
އާދަމް ޝަރީފް މިހެން ވިދާޅުވެފައިވާއިރު، މަސްތުވާތަކެތީބެ ބޮޑެތި މައްސަލަތަކުގެ ތުހުމަތުގައި ހައްޔަރުކުރި ބައެއް މީހުން ވަނީ ދާދިފަހުން މިނިވަންކޮށްފައެވެ. އެގޮތުން މިއަހަރުގެ ސެޕްޓެމްބަރު މަހުގެ 14 ވަނަ ދުވަހު މާލެއިން އެއް ކިލޯއަށް ވުރެ ގިނަ މަސްތުވާތަކެއްޗާއިއެކު ހައްޔަރު ކޮށްފައިވާ ފަސް މީހަކު ދޫކޮށްލަން ކްރިމިނަލް ކޯޓުން ދާދިފަހުން ވަނީ އަމުރުކޮށްފައެވެ.
