މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ޕްރައިމަރީގައި ވާދަ ކުރުމުގެ ފުރުސަތު މިއަދު ހުޅުވާލައިފިއެވެ.
އެޕާޓީން މިއަދު ހުޅުވާލި މި ފުރުސަތުގެ މުއްދަތު ހަމަވާނީ ޑިސެމްބަރ 14 ވަނަ ދުވަހު މެންދުރު ފަަހު 2:00 އާ ހަމައަށް ކަމަށް އެޕާޓީން ވަނީ ބުނެފައެވެ. އެމްއެންޕީގެ ރިޔާސީ ޕްރައިމަރީގައި ވާދަކުރައްވާނޭ ކަމަށް އެޕާޓީގެ ރައީސް މުހައްމަދު ނާޒިމް ވަނީ ކުރިން ވިދާޅުވެފައެވެ.
"އެމްއެންޕީގެ ފުރަތަމަ ރިޔާސީ ކެންޑިޑޭޓު ހޮވުމަށް ބާއްވާ ޕްރައިމަރީގައި ވާދަކުރުމުގެ ފުރުސަތު މިއަދު ވަނީ ހުޅުވާލައިފައި. މިއީ ޕާޓީގެ ވަރަށް މުހިންމު ހަރަކާތަކަށް ވެގެންދާނެ. އަދި ރާއްޖޭގެ ސިޔާސީ މަސްރަހުގައި ވެސް ވަރަށް މުހިންމު ކަމަކަށް މިކަން ވެގެންދާނެ. ކުރިއަށް މިއޮތް ދުވަސްތަކުގައި ގާބިލް ބޭފުޅުން ރިޔާސީ ޕްރައިމަރީއަށް ކުރިމަތި ލެއްވުން އެއީ ޕާޓީގެ ވަރަށްބޮޑު އުންމީދެއް،" އެމްއެންޕީގެ ތަރުޖަމާނު ޝިދާތާ ޝަރީފް ވިދާޅުވިއެވެ.
ޝިދާތާ ވިދާޅުވީ ރިޔާާސީ ޕްރައިމަރީގެ ހުރިހާ މަރުހަލާއެއްގައި ވެސް ދެފުށްފެންނަ ގޮތަކަށް ހުރިހާކަމެއް ވެސް ކުރިއަށް ގެންދާނޭ ކަމުގެ ޔަގީންކަން ޕާޓީގެ ފަރާތުން ދެއްވާ ކަމަށެވެ. ކުރިއަށްއޮތް ތަނުގައި ވެސް ސިޔާސީ މަސައްކަތްތައްކޮށް ފުރިހަމަ ކާމިޔާބީތަކެއް ހޯދާނޭ ޕާޓީއަކަށް އެމްއެންޕީ ވެގެންދިއުމަކީ ވަރަށް ބޮޑު އުންމީދެއް ކަމަށް ޝިދާތާ ވިދާޅުވިއެވެ.
