ވަރލްޑް ކަޕް ކުއާޓާފައިނަލުގައި ޕެނަލްޓީ ޖަހައިގެން ކްރޮއޭޝިޔާ އަތުން ބަލިވެ މުބާރާތުން ކެޓުމުން ލިބުނު ހިތްދަތިކަން ފިލުވާލަން، ބްރެޒިލްގެ ގައުމީ ޓީމުގެ އިތުބާރު ޑިފެންޑަރު ތިއާގޯ ސިލްވާ މިއަދު ރާއްޖެ އަތުވެއްޖެއެވެ.
"ހަލި ނިއުސް" އަށް އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި ތިއާގޯ ސިލްވާ ޗުއްޓީ ހޭދަކުރަމުން ދަނީ ބ.އަތޮޅުގައި އޮންނަ ސޮނޭވާ ޖާނީ ރެޒޯޓުގައެވެ. އަދި މިދަތުރުގައި އޭނާއާއެކު އިތުރު 5 މީހަކު ރާއްޖެ އައި ކަމަށްވެސް ވަނީ މައުލޫމާތު ލިބިފައެވެ. އެކަމަކު މީގެ ތެރޭގައި ބްރެޒިލް ގައުމީ ޓީމުގެ އެއްވެސް ކުޅުންތެރިޔަކު ނުހިމެނެއެވެ.
ވަރލްޑް ކަޕުން ނާކާމިޔާބުވި ގައުމުތަކުގެ މަޝްހޫރު ގިނަ ކުޅުންތެރިން މިފަހަރު ހިތްދަތިކަން ފިލުވާލުމަށް އިހްތިޔާރު ކުރި ގައުމަކީ ދުނިޔެ މަތީގެ ސުވަރުގެ ކަމުގައި ފަތުރުވެރިން ސިފަކުރާ މިކުޑަކުޑަ ދިވެހިރާއްޖެއެވެ. ވަރލްޑް ކަޕުން ލިބުނު ހިތްދަތިކަން ފިލުވާލަން ރާއްޖޭގައި މިވަގުތު ޗުއްޓީ ހޭދަކުރަމުން އަންނަ މަޝްހޫރު ތަރިންގެ ތެރޭގައި އުރުގުއޭގެ މަޝްހޫރު ފޯވާޑް ލުއިސް ސްއަރޭޒް އާއި ޕޮލެންޑުގެ މަޝްހޫރު ފޯވާޑް ރޮބާޓް ލެވަންޑޮސްކީ، ބެލްޖިއަމްގެ އެއްނަންބަރު ކީޕަރު ތިބައުޓް ކޯޓުއާ ފާހަގަ ކޮށްލެވެއެވެ.
ރާއްޖެއަކީ ވޯލްޑް ޓްރެވެލް އެވޯޑްސްގައި ފާއިތުވެދިޔަ 3 އަހަރު "ވަރލްޑް ލީޑިންގ ޑެސްޓިނޭޝަން" ގެ ފަހްރުވެރި އެއްވަނަ ހޯދައި ދުނިޔޭގެ ޓޫރިޒަމް އިންޑަސްޓްރީގައި އެންމެ ނަން ހިނގާ އެއްގައުމެވެ.
