ވަރލްޑް ކަޕުގެފައިނަލަށް ނެދެވުމުގެ ހިތާމަ އޮތްނަމަވެސް، ތިންވަނަ ހޮވާ މެޗުވެސް ފަސޭހަކޮށް ނުނަގާނެ ކަމަށް ކްރޮއޭޝިޔާ އަދި މޮރޮކޯ އިން ބުނެފިއެވެ.
ރާއްޖޭ ގަޑިން މިރޭ 20:00 ގައި ފެށުމަށް ހަމަޖެހިފައިވާ ތިންވަނަ ހޮވާ މެޗަށް ނިކުތުމުގެ ކުރިން މޮރޮކޯގެ ކޯޗް ވަލީދު ރަކްރާކީ ބުނީ ސެމީފައިނަލުން ބަލިނަމަވެސް މޮރޮކޯގައި މިވަގުތު އޮތް ޓީމަކީ ދުނިޔޭގެ އެންމެ މަތީ ފަންތީގައި ވާދަކުރެވޭނެ ޓީމެއްކަން ސާބިތު ކޮށްދެވިއްޖެކަމަށެވެ.
"އަހަރެމެން ބޭނުންވީ ފްރާންސް ބަލިކޮށް ފައިނަލް ކުޅެން. އެކަމަކު އެކަން ހާސިލް ނުވިޔަސް ތިންވަނަ ހޯދަން އަހަރެމެން ބޭނުން. ޓީމުގައި ވަރުބަލިކަންވެސް ވަރަށް ބޮޑު. އަމާޒަކީ މެޑެއްޔަކުން މުބާރާތް ނިންމާލުން" ރަކްރާކީ ބުންޏެވެ.
ކްރޮއޭޝިޔާގެ ކޯޗް ޑޫސަން ޑަލިޗް ބުނީ ވަރލްޑް ކަޕުގެ ތިންވަނަ ހޮވާ މެޗަކީ ކުޑަ މެޗަކަށް ނުވާނެ ކަމަށާއި މޮރޮކޯ ބަލިކޮށް ތިންވަނަ ހޯދުމުގެ ރޫހު އޭނާގެ ކުޅުންތެރިން މެދުގައި އެބައޮތް ކަމަށެވެ. "މޮރޮކޯއިން މުބާރާތުގައި ދެއްކި ކުޅުމާއި ނެރުނު ނަތީޖާތަކަށް ތައުރީފް ހައްގު. މުބާރާތުގެ ސަޕްރައިޒް ޓީމަކީ މޮރޮކޯ" އެންމެފަހުގެ ވަރލްޑް ކަޕުގައި ކްރޮއޭޝިޔާ ގޮވައިގެން ފައިނަލުގައި ކުޅުނު ޑަލިޗް ބުންޏެވެ.
މޮރޮކޯ އާއި ކްރޮއޭޝިޔާ މިފަހަރުގެ ވަރލްޑް ކަޕުގައި ހިމެނުނީ އެއްގްރޫޕެއްގައެވެ. ގްރޫޕް ސްޓޭޖުގައި މިދެގައުމު ކުޅުނު މެޗް ލަނޑެއް ނުޖެހި އެއްވަރު ވުމުން ކްރޮއޭޝިޔާގެ މީޑިޔާއިން ވަރަށް ބޮޑަށް ޓީމަށް ފާޑު ކިޔުން އަމާޒު ކުރިއެވެ. ޑަލިޗް ބުނީ މޮރޮކޯއަކީ ކިހާ ފެންވަރެއްގެ ޓީމެއްކަން މުޅި ދުނިޔެއަށް އެގައުމުން ސާބިތު ކޮށްދީފިކަމަށާއި ފުރަތަމަ މެޗުގައި މޮރޮކޯ އަތްދަށު ނުވެ ފަރުޖައްސާލެވުމަކީ ރަނގަޅު ނަތީޖާއެއް ކަން މިހާރު ގަބޫލް ކުރެވޭނެ ކަމަށެވެ.
މިރޭގެ މެޗް އެންމެ ބޮޑަށް ހާއްސަވާ އެއްކުޅުންތެރިޔަކީ ކްރޮއޭޝިޔާގެ ކެޕްޓަން ލޫކާ މޮޑްރިޗެވެ. މިހާރު އުމުރުން 37 އަހަރުގެ މޮޑްރިޗް، މިފަހަރުގެ ވަރލްޑް ކަޕަށްފަހު ރިޓަޔަރ ކުރާނެކަމަށް ބެލެވޭއިރު މިރޭގެ މެޗަކީ ކްރޮއޭޝިޔާގެ ޖަރޒީގައި މޮޑްރިޗް ފެނިގެންދާނެ އެންމެފަހު މެޗަށްވުން އެކަށީގެންވެއެވެ.
