ކެޕްޓަން ލިއޮނަލް މެސީ އާއި އާޖެންޓީނާ ގައުމީ ޓީމް ވަރލްޑް ކަޕް ތަށި ހިފައިގެން ވެރިރަށް ބުއެނޯސް އައިރެޒްގައި ކުރިއަށް ގެންދިޔަ ބަސް ޕެރޭޑް ބަލަން ނިކުތް މީހުންގެ އަދަދު އާދަޔާ ހިލާފަށް ގިނަވުމާއި ސެކިއުރީޓީގެ ބައެއް ސަބަބުތަކާ ހުރެ ހެލިކޮޕްޓަރުގައި ނިންމާލަން ޖެހިއްޖެއެވެ.
އާޖެންޓީނާގެ މީޑިޔާ ރިޕޯޓްތައް ބުނާ ގޮތުން ޕެރޭޑް ބަލަން ބުއެނޯސް އައިރެޒްގެ މަގުތަކަށް ނިކުތް މީޙުންގެ އަދަދު 5 މިޔަނަށްވުރެ ގިނަވާނެއެވެ. މިމަންޒަރުތައް ދައްކުވައިދޭން ޑްރޯނުން ނަގާފައިވާ ވީޑިޔޯތަކާއި ފޮޓޯތައް ސޯޝިއަލް މީޑިޔާގައި ދަނީ ދައުރުވަމުންނެވެ.
ވަރލްޑް ކަޕް ތައްޓާއެކު އާޖެންޓީނާ ގައުމީ ޓީމު ބަހުގައި މަގުތަކުގައި ދަތުރު ކުރަމުންދިޔައިރު މަގުތަކަށް ނިކުމެ ތިބި ބައެއް ސަޕޯޓަރުން ވަނީ ބަސް ހުއްޓުވުމަށްވެސް މަސައްކަތް ކޮށްފައެވެ. އަދި މަގުތަކުގެ މަތިން ދަމާފައިވާ ބައެއް ކަރަންޓް ކޭބަލްތަކުގެ ސަބަބުން ކުޅުންތެރިން ބަހުން ވެއްޓި ހިތާމަވެރި ހާދިސާތައްވެސް ހިނގާފައި ނުވަނީ ހަމަކިރިޔާއެވެ.
އާޖެންޓީނާގެ ފުޓްބޯޅަ ފެޑެރޭޝަނުން ކުރި ޓްވީޓެއްގައި ބުނެފައި ވަނީ ބަސް ޕެރޭޑް ފުރިހަމަ ނުކޮށް ހެލިކޮޕްޓަރުގައި ރައްޔިތުންނަށް ތަށި ދައްކާލަން ޖެހުނީތީ މައާފަށް އެދޭ ކަމަށެވެ.
"ސަލާމަތީ ބާރުތަކުން އިރުޝާދު ދިނީ ބަހުގައި އިތުރަށް ކުރިއަށް ނުދިޔުމަށް. މަގުތަކަށް ނިކުމެ ތިބި އެންމެނާ ހަމައަށް ބަހުގައި ނުދެވުނުކަމަށްޓަކައި އެއްހާސް ފަހަރު ސަޕޯޓަރުން ކިބައިން މައާފަށް އެދެން" އާޖެންޓީނާގެ ފުޓްބޯޅަ އެސޯސިއޭޝަނުން ކުރި ޓްވީޓުގައި ބުނެފައިވެއެވެ.
އާޖެންޓީނާ ގައުމީ ޓީމް ތައްޓާއެކު އެގައުމަށް ދިޔައީ އާޖެންޓީނާ ގަޑިން އިއްޔެ ފަތިހު 5 ޖަހާކަން ހާއިރުއެވެ. އޭރު އާޖެންޓީނާ ސަރުކާރުން އޮތީ އިއްޔެއަކީ ރަސްމީ ބަންދު ދުވަހެއް ގޮތުގައި ހަމަޖައްސާފައެވެ. ތައްޓާއެކު އާޖެންޓީނާ ގައުމީ ޓީމު ފުރަތަމަ ދިޔައީ އެގައުމުގެ ފުޓްބޯޅަ އިދާރާއަށެވެ. އޭރުވެސް އުފާފާޅު ކުރަން މަގުތަކަށް މިލިޔަނެއްހައި މީހުން ނިކުމެތިބިކަމަށް މީޑިޔާ ރިޕޯޓުތައް ބުނެއެވެ.
މިފަހަރުގެ ވަރލްޑް ކަޕް އާޖެންޓީނާއިން ކާމިޔާބު ކުރީ ފުރިހަމަ ވަގުތު (އިތުރަށް ކުޅުނު 15 މިނެޓުގެ ދެހާފް ހިމަނައިގެން) ހަމަވިއިރު 3-3 އިން އެއްވަރު ވެފައި އޮތުމުން ޕެނަލްޓީ ޖަހައިގެން ފްރާންސްގެ މައްޗަށް 4-2 އިން ކުރި ހޯދައިގެންނެވެ.
މިއީ އާޖެންޓީނާއިން ވަރލްޑް ކަޕުގެ ޗެމްޕިއަންކަން ހޯދި 3 ވަނަ ފަހަރެވެ. މީގެ ކުރިން އެގައުމުން ޗެމްޕިއަންކަން ހޯދީ 1978 އަދި 1986 ގައެވެ.
