ޕީޕީއެމް ދަފްތަރުން "ވަގަށް" ނަގައިފައިވާ މެމްބަރުން އަލުން އެޕާޓީގައި ރަޖިސްޓްރީ ކޮށްދިނުމަށް އިލެކްޝަންސް ކޮމިޝަނުގައި އެދޭތާ އަހަރެެއް ވެއްޖެ ކަމަށް އެޕާޓީގެ ސެކްރެޓަރީޖެނެރަލް މުހައްމަދު ތަލާލް ވިދާޅުވެއްޖެއެވެ.
އޭނާ ކުރެއްވި ޓުވީޓެއްގައި ވިދާޅުވެފައިވަނީ އެ މެންބަރުން އަލުން އެ ޕާޓީއަށް ރުޖޫއަކޮށް ދިނުމަށް އެދުމުން ވެސް ކަމާ ބެހޭ ފަރާތުން އެކަން އެގޮތަށް ކޮށްދީފައި ނުވާކަމަށެވެ. އޭނާ މިހެން ވިދާޅުވީ އެމްޑީޕީން ސާޅީސްހާސް މެމްބަރުން އެމީހުންނަށް ނޭނގި ދަފްތަރުން އުނިކޮށްފައިވާ ކަމަށް އެޕާޓީގެ ރައީސް މުޙައްމަދު ނަޝީދު ވިދާޅުވެފައިވަނިކޮށްނެވެ. ރައީސް ނަޝީދު މިހެން ވިދާޅުވުމުން އެމްޑީޕީން ބުނެފައިވަނީ މެމްބަރުންނަށް ނޭނގި އެ ޕާޓީގެ ދަފްތަރުން ވަކިކޮށްފައިވާނަމަ އެ ކަމަށް ޚާއްސަ ފޯމު ފުރުމަށްފަހު އީސީއަށް ހުށަހެޅުމަށެވެ. ހުށަހެޅުމުން އެކަން ބަލައި އަލުން ދަފްތަރުގައި ރަޖިސްޓްރީ ކޮށްދޭނޭ ކަމަށް އެޕާޓީން ބުނެފައިވެއެވެ.
މިކަމާ ގުޅިގެން ޕީއެމްގެ އެސްޖީ ކުރެއްވި ޓުވީޓުގައި ވިދާޅުވެފައިވަނީ "ޕީޕީއެމް ގެ ދަފްތަރުން ވަގަށް ނަގާފައިވާ މެންބަރުން އެދެފިނަމަ އަނބުރާ ޕީޕީއެމަށް ބަދަލުކޮށްދިނުމަށް އެދޭތާ އެއް އަހަރުވީއިރުވެސް އެކަން ކުރުމަށް ޤާނޫނީ ހުރަސް ހުރިކަމަށް ބުނެ ހުއްޖަތް ދެއްކުމަށްފަހު، މިއަދު އެމްޑީޕީ ބޭނުންވުމުން މިކަން ހަމަ ޓަސް،" ކަމަށެވެ.
