އެމެރިކާ ލީގަށް ބަދަލުވާން އުޅޭކަމަށް އަޑުތައް ފެތުރިފައިވާ މަޝްހޫރު ފުޓްބޯޅަ ކުޅުންތެރިޔާ ލިއޮނަލް މެސީ އޭނާ މިހާރުވެސް ކުޅެމުން އަންނަ ޕީއެސްޖީގެ ކޮންޓްރެކްޓް އާކުރަން އެއްބަސްވެފައިވާ ކަމަށް ފުޓްބޯޅައިގެ ޚަބަރުތައް ގެނެސްދިނުމަށް މަޝްހޫރު "ގޯލް.ކޮމް" އިން ބުނެފިއެވެ.
ގޯލް.ކޮމް އިން ބުނެފައި ވަނީ އެމެރިކާގެ އިންޓަ މިއާމީއަށް މެސީ ބަދަލުވުމުގެ ފުރުސަތު މިހާރު ނެތް ކަމަށެވެ. ކުރީގެ މަޝްހޫރު ފުޓްބޯޅަ ކުޅުންތެރިޔާ ޑޭވިޑް ބެކަމްގެ ހިއްސާ އޮންނަ އަދި ބެކަމް ރައީސްކަން ކުރަމުން އަންނަ އިންޓަމިއާމީއަށް ބަދަލު ވުމުގެ ޝައުގުވެރިކަން މެސީވެސް ކުރިން ފާޅު ކުރިއެވެ.
ބާސެލޯނާގެ މާލީ ހާލަތު ދަށްވެ ކޮންޓްރެކްޓް އާކުރެވެން ނެތް ކަމަށް އެކްލަބުން މެސީ ދޫކޮށްލީ 2021 ވަނަ އަހަރުގެ އޮގަސްޓް މަހުއެވެ. ހިލޭ ޓްރާންސްފާއެއްގައި ޕީއެސްޖީއާ މެސީ ގުޅުނީ 2 އަހަރުގެ އެއްބަސްވުމެއްގެ ދަަށުންނެވެ.
ގަތަރުގައި މިމަހުގެ 18 ވަނަ ވަނަ ދުވަހު ނިމިގެންދިޔަ ވަރލްޑް ކަޕް ފުޓްބޯޅަ މުބާރާތް އާޖެންޓީނާއަށް ކާމިޔާބު ކޮށްދިނުމަށްފަހު އުފާފާޅު ކުރުމަށް މިވަގުތު މެސީ ހުރީ އާޖެންޓީނާގައެވެ. ގޯލް.ކޮމްއިން ބުނެފައި ވަނީ ޕީއެސްޖީއާއެކު ކޮންޓްރެކްޓް އާކުރުމުގެ ރަސްމީ މަޝްވަރާތައް މެސީ ކުރިއަށް ގެންދާނީ ޗުއްޓީ ނިންމާލުމަށްފަހު އެނބުރި ޕެރިހަށް ގޮހެވެ.
ޕީއެސްޖީއަކީ އަކީ ގަތަރުގެ ޝާހީ އާއިލާއިން 2011 ވަނަ އަހަރު ގަނެ ހިންގަމުން އަންނަ ކްލަބެކެވެ. ކްލަބުގެ ކަންކަމުގައި އެންމެ ފަހު ބަސް ވިދާޅުވާ ބޭފުޅަކީ ގަތަރުގެ އަމީރު ތަމީމް ހަމަދު ބިން އަލް ތާނީއެވެ.
