މިމަހުގެ 18 ވަނަ ދުވަހު ގަތަރުގައި ނިމުނު ވަރލްޑް ކަޕުގައި ފްރާންސް ގައުމީ ޓީމަށް ކުޅުނު ވިންގަރ ކިންގްސްލޭ ކޯމަން ޗުއްޓީ ހޭދުކޮށްމަށް މިއަދު ހެނދުނު ރާއްޖެ އަތުވެއްޖެއެވެ.
އުމުރުން 26 އަހަރުގެ ކޯމަން ފައިނަލް މެޗުގައި ކުޅެން އެރީ 71 ވަނަ މިނެޓުގައި މިޑްފީލްޑަރު އެންޓޯނިއޯ ގްރީޒްމަންގެ ބަދަލުގައެވެެ. ފަހަތުން އަރައި 2-2 އިން ފްރާންސުން ނަތީޖާ ހަމަހަމަ ކުރުމުގައި ކޯމަންގެ ދައުރު ބޮޑެވެ. އެކަމަކު ޕެނަލްޓީ ޝޫޓް އައުޓުގައި ކޯމަން ޖެހި ޕެނަލްޓީ އާޖެންޓީނާ ކީޕަރު އެމީ މާޓިނޭޒް ދިފާއު ކުރީއެވެ.
ފައިނަލް މެޗަށްފަހު ފްރާންސްގެ ސަޕޯޓަރުން ވަނީ އޮންލައިން ޕްލެޓްފޯމްތަކުގައި ނަސްލީ ގޮތުން ކޯމަންއާ ދިމާ ކޮށްފައެވެ. ކޯމަންގެ އިތުރުން، ފަހު ވަގުތު ލީޑް ނަގަން ލިބުނު ރަނުގެ ފުރުސަތު ބޭކާރުވި ކޯލޯ މުއާނީ އާއި ޕެނަލްޓީ ބޭކާރުވި އައުރެލިއަން ޗުއަމެނީއަށްވެސް ފްރާންސް ސަޕޯޓަރުން ވަނީ ނަސްލީ ގޮތުން ދިމާ ކޮށްފައެވެ. މިތިން ކުޅުންތެރިންނަކީވެސް އެފްރިކާގެ ގައުމުތަކަށް ނިސްބަތްވާ ކުޅުންތެރިންނެވެ.
ކޯމަން ރާއްޖެ އައިސްފައި މިވަނީ ވަރލްޑް ކަޕަށްފަހު ގިނަ ތަރިންތަކެއް ޗުއްޓީ ހޭދަކުރުމަށް ރާއްޖެ އަންނަމުންދާ ދަނޑިވަޅެއްގައެވެ. ވަރލްޑް ކަޕަށްފަހު ރާއްޖެއަށް ޗުއްޓީ ހޭދަކުރަން އައި މަޝްހޫރު ކުޅުންތެރިންގެ ތެރޭގައި އުރުގުއޭގެ ފޯވާޑް ލުއިސް ސްއަރޭޒް އާއި ޕޮލެންޑުގެ ފޯވާޑް ރޮބާޓް ލެވަންޑޮސްކީ ފާހަގަ ކޮށްލެވެއެވެ.
