ހދ. ނޮޅިވަރަމް ގެއެއްގައި މަރުވެފައި އޮއްވައިފެނުނު ނިޝާމާ މުހައްމަދުގެ ހަށިގަނޑު ޕޯސްޓްމޯޓަމް ހެދުމަށްފަހު މިއަދުގެ ވަގުތެއްގައި މާލެ ގެނެސްފައިވާ ކަމަށް ފުލުހުން ވިދާޅުވެއްޖެއެވެ.
ނިޝާމާ މަރުވެފައި އޮއްވައި ފެނިފައިވަނީ އެރަށުގައި އޭނާ ދިރިއުޅޭ ގޭގެ ކޮޓަރީންނެވެ. އެ ހާދިސާ ހިނގާފައިވަނީ މިހިނގާ ޑިސެމްބަރ 10 ވަނަ ދުވަހު އެވެ. އޭނާގެ ހަށިގަނޑު ޕޯސްޓްމޯޓަމް ހަދާފައިވަނީ އަވަށްޓެރި އިންޑިއާއިންނެވެ. ޕޯސްޓުމޯޓަމް ހެދުމަށް އިންޑިއާއަށް ހަށިގަނޑު ފޮނުވީ މިމަހު 22 ވަނަދުވަހުއެވެ.
ނިޝާމާގެ ހަށިގަނޑު މިއަދުގެ ވަގުތެއްގައި މާލެ ގެނެސްފައިވިޔަސް ޕޯސްޓް މޯޓަމްގެ ރިޕޯޓާ ބެހޭ ގޮތުން ފުލުހުން އަދި އެއްޗެއް ވިދާޅެއް ނުވެއެވެ. އެހެންނަމަވެސް ވަރަށް އަވަހަށް ރިޕޯޓު ލިބޭނޭކަމަށް ކުރިން ވަނީ ވިދާޅުވެފައެވެ.
ނިޝާމާގެ މަރުގެ ތުހުމަތު ކުރެވިފައިވަނީ އޭނާގެ ފިރިމީހާ އަބޫބަކުރު ފަައިސަލަށެވެ. އެ މައްސަލާގައި އޭނާ ހައްޔަރު ކުރުމަށްފަހު ބަންދުގައި ބަހައްޓާފައިވަނިކޮށް ވަނީ ދަންޖެހެން މަސައްކަތް ކޮށްފައެވެ. އެ މަންޒަރު ފުލުހުންނަށް ފެނިގެން އޭނާ ހޮސްޕިޓަލަށް ގެންގޮސް ފަރުވާ ދެމުންދަނިކޮށް ވަނީ މިދިޔަ ހޯމަދުވަހު މަރުވެފައެވެ.
ނިޝާމާގެ ޖަނާޒާ ބޭއްވުމަށް ހަމަޖެހިފައިވަނީ މިއަދު މަޣުރިބު ނަމާދަށްފަހު އައު ސަހަރާގައެވެ.
