ހދ. ނޮޅިވަރަމް ގެއެއްގައި މަރުވެފައި އޮއްވައިފެނުނު ނިޝާމާ މުހައްމަދު މަރާލައިފައިވަނީ އޭނާގެ ކަރުގައި އެއްޗެއް އަޅައި ނޭވާ ހާސްކޮގެން ކަމަށް ޕޯސްޓް މޯޓަމްގެ ވަގުތީ ރިޕޯޓުގައި ބުނެފައިވާ ކަމަށް ފުލުހުން ރޭ ވިދާޅުވެއްޖެއެވެ.
"ނިޝާމާ މުހައްމަދު ޕޯސްޓުމޯޓަމްގެ ވަގުތީ ރިޕޯޓު ވަނީ ލިބިފައި. އެ ރިޕޯޓުގައިވާގޮތުން ނިޝާމާ މުހައްމަދު މަރާލައިފައިވަނީ ކަރުގައި އެއްޗެއް އަޅައި ނޭވާ ހާސްކޮށްގެން،" ފުލުހުން ވިދާޅުވެފައިވެއެވެ. އެހެންނަމަވެސް އެކަމާ ބެހޭ އިތުރު އެއްވެސް އެއްޗެއް ފުލުހުން ވިދާޅެއް ނުވެއެވެ.
ނިޝާމާ މަރުވެފައި އޮއްވައި ފެނިފައިވަނީ އެރަށުގައި އޭނާ ދިރިއުޅޭ ގޭގެ ކޮޓަރީންނެވެ. އެ ހާދިސާ ހިނގާފައިވަނީ މިހިނގާ ޑިސެމްބަރ 10 ވަނަ ދުވަހު އެވެ. އޭނާގެ ހަށިގަނޑު ޕޯސްޓްމޯޓަމް ހަދާފައިވަނީ އަވަށްޓެރި އިންޑިއާއިންނެވެ. ޕޯސްޓުމޯޓަމް ހެދުމަށް އިންޑިއާއަށް ހަށިގަނޑު ފޮނުވީ މިމަހު 22 ވަނަދުވަހުއެވެ.
ނިޝާމާގެ ހަށިގަނޑު އިއްޔެގެ ވަގުތެއްގައި މާލެ ގެނެސް މަޣުރިބު ނަމާދަށްފަހު ވަނީ ޖަނާޒާ ބާއްވައިފައެވެ.
ނިޝާމާގެ މަރުގެ ތުހުމަތު ކުރެވިފައިވަނީ އޭނާގެ ފިރިމީހާ އަބޫބަކުރު ފަައިސަލަށެވެ. އެ މައްސަލާގައި އޭނާ ހައްޔަރު ކުރުމަށްފަހު ބަންދުގައި ބަހައްޓާފައިވަނިކޮށް އޭނާވަނީ ދަންޖެހެން މަސައްކަތް ކޮށްފައެވެ. އެ މަންޒަރު ފުލުހުންނަށް ފެނިގެން އޭނާ ހޮސްޕިޓަލަށް ގެންގޮސް ފަރުވާ ދެމުންދަނިކޮށް ވަނީ މިދިޔަ ހޯމަދުވަހު ވަނީ މަރުވެފައެވެ.
