ފުޓްބޯޅައިގެ ތާރިހުގައި މިހާތަނަށް ފެނިފައިވާ އެންމެ ވާދަވެރި ދެކުޅުންތެރިންނަކީ އާޖެންޓީނާގެ ތަރި ލިއޮނަލް މެސީ އާއި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ކަމާމެދު ދެބަސްވާނެ އެއްވެސް މީހަކު ނުހުންނާނެއެވެ.
މިދެކުޅުންތެރިންގެ ވާދަވެރިކަމަށް އިތުރު ފުރިހަމަކަމެއް ލިބެނީ ދެކުޅުންތެރިންނަށް މަރުދޭ ސަޕޯޓަރުންގެ މެދުގައި އޮންނަ ވާދަވެރިކަމުގެ ސަބަބުންނެވެ. އެއްކުޅުންތެރިޔަކު އަނެއް ކުޅުންތެރިޔަކަށް ވުރެ މޮޅު ކަމަށް ދައްކާ "މޮޅެތި ވާހަކަ" ތަކުގެ ސަބަބުންނެވެ.
ވާދަވެރިކަމުގެ މިރޭހުގައި މެސީ އާއި ސަޕޯޓަރުން އިތުރު ހަރުފަތެއް ކުރިއަށް ޖެހިލީ މިދިޔަ ހަފްތާގެ އަދިއްތަ ދުވަހު ވަރލްޑް ކަޕް ފައިނަލުގައި އެންމެފަހުގެ ޗެމްޕިއަން ފްރާންސް ބަލިކޮށް، ވަރލްްޑް ކަޕުގެ ރަން ތަށި މެސީ އުފުލާ ލުމުންނެވެ.
ވަރލްޑް ކަޕް މެސީ ކާމިޔާބު ކުރުމާއެކު ފުޓްބޯޅައިގެ ކުރީގެ ތަރިންނާއި މިހާރުގެ ތަރިންނާއި ގައުމުތަކުގެ އިސްވެރިން މެސީ އާއި އާޖެންޓީނާއަށް މަރުހަބާގެ މެސުޖައް އޮއްސާލިއެވެ މީގެ ތެރޭގައި ޕޯޗުގަލްގެ ކުރީގެ ތަރި ލުއިސް ފީގޯ އާއި އިނގިރޭސި ޝާހީ އާއިލާ އާއި ރާއްޖޭގެ ފުޓްބޯޅަ އެސޯސިއޭޝަންވެސް ހިމެނެއެވެ.
އެކަމަކު ވަރލްޑް ކަޕުގެ ކާމިޔާބީއަށް ހަފްތާއެއް ވެގެންދިޔައިރުވެސް ވާދަވެރި ރޮނާލްޑޯގެ ފަރާތުން މަރުހަބާގެ މެސެޖެއް މެސީ އާއި އާޖެންޓީނާ ގައުމީ ޓީމަށް ލިބިފައެއް ނުވެއެވެ. ސޯޝިއަލް މީޑިޔާގައި އެންމެ ގިނަބަޔަކު "ފްލޯ ކުރާ" ރޮނާލްޑޯގެ އެއްވެސް ހަރަކާތެއް ޑިސެމްބަރު 11 ގެ ފަހުން ފެންނާކަށް ނެތެވެ.
މެސީ ވަރލްޑް ކަޕް ކާމިޔާބު ކުރުމާއެކު ރޮނާލްޑޯ "ސޯޝިއަލް މީޑިޔާ" އިން ގެއްލުނީ ހެއްޔެވެ؟
އެތައް އިންްޓަވިއުއެއްގައި ރޮނާލްޑޯ ބުނެފައި ވަނީ އޭނާ އާއި މެސީއާ މެދު "ވާދަވެރި ކަމެއް" ނެތް ކަމަށެވެ. ވާދަވެރިކަން އުފައްދައިގެން އުޅެނީ މީޑިޔާއިން ކަމަށެވެ. އޭގެ ބަދަލުގައި އެދެކުޅުންތެރިން މެދުގައި އޮތީ އެކަކު އަނެކަކަށް އިހްތިރާމް ކުރާ "ރަހްމަތްތެރި ގުޅުމެއް" ކަމަށެވެ.
އެކުގައި ކުޅުނު ކުޅުންތެރިން ކާމިޔާބު ހޯދުމުންވެސް ރޮނާލްޑޯ ވަނީ މީގެ ކުރިން އެކުޅުންތެރިންނަށް މަރުހަބާ ނުކިޔައި ސޯޝިއަލް މީޑިޔާއިން ބައެއްފަހަރު އެއްފަރާތް ވެލާފައެވެ. މިގޮތުން މިއަހަރު ކަރީމް ބެންޒީމާ ބެލޮންޑިއޯ ކާމިޔާބު ކުރުމުން ރޮނާލްޑޯ އޭނާއަށް މަރުހަބާ ކިޔާފައެއް ނުވެއެވެ. ބެންޒީމާއަކީ ރޮނާލްޑޯއާއެކު 9 އަހަރު ރެއާލްއަށް ކުޅުނު ކުޅުންތެރިއެކެވެ.
ރޮނާލްޑޯ ސޯޝިއަލް މީޑިޔާގައި މިދުވަސްކޮޅު ހަރަކާތްތެރި ނޫން ނަމަވެސް އޭނާގެ ދައްތަ ކެޓިއާ އެވެއިރޯ އާއި ރޮނާލްޑޯ ޕްރޮމޯޓް ކުރުމުގައި އާދަޔާ ހިލާފް ހިތްވަރެއް ދައްކަމުން އަންނަ ނޫސްވެރިޔާ ޕިއާސް މޯގަން، ވަރލްޑް ކަޕް ތަށި އާޖެންޓީނާ ކާމިޔާބު ކުރުމާއެކު ބުނެފައި ވަނީ ގަތަރު ވަރލްޑް ކަޕަކީ މިހާތަނަށް ބޭއްވި އެންމެ ފީކަޅާ ވަރލްޑް ކަޕަށެވެ.
"މިހާތަނަށް ބޭއްވި އެންމެ ފީކަޅާ ވަރލްޑް ކަޕް މިއީ. އެކަމަކު ރަނގަޅު ފައިނަލެއް ފެނުނީތީ ޝުކުރުވެރިވަން. މަރުހަބާ އާޖެންޓީނާ" ފައިނަލް މެޗަށްފަހު ރޮނާލްޑޯގެ ދައްތަ ކެޓިއާގެ އިންސްޓަގްރާމުން ކުރި ޕޯސްޓެއްގައި ބުންޏެވެ.
