މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ ރަސްމީކޮށް ސައުދީ އަރަބިއްޔާގެ އަލް ނަސްރުގެ ކުޅުންތެރިއެއްގެ ގޮތުގައި ދައްކާލުމަށް ރޭ ހާއްސަ ހަފްލާއެއް ބާއްވައިފިއެވެ.
އަލް ނަސްރުގެ ފަންސަވީސް ހާސް ސަޕޯޓަރުންގެ ޖާގައިގެ މަރްސޫލް ޕާކް ސްޓޭޑިއަމްގައި ބޭއްވި މިހަފްލާއަށް ސަޕޯޓަރުން ވަަނީ ދަނޑު އެއްކޮށް ފުރާލާފައެވެ. މިހަފްލާގައި ރޮނާލްޑޯއާއެކު އޭނާގެ ލޯބިވެރިޔާ ޖޯޖީނާ އާއި ދަރިންވެސް ބައިވެރިވިއެވެ.
ރޮނާލްޑޯ، އަލް ނަސްރަށް ސޮއި ކުރީ ދުނިޔޭގެ ތާރިހުގައި އެންމެ މުސާރަ ބޮޑު ކުޅުންތެރިޔާގެ ގޮތުގައެވެ. މުސާރައިގެ ގޮތުގައި އަލް ނަސްރުން ރޮނާލްޑޯއަށް 95 މިލިޔަން ޑޮލަރު ދެއެވެ. އަދި ސްޕޮންސާޝިޕްތަކާއެކު ރޮނާލްޑޯއަށް އަހަރަކު 200 މިލިޔަން ޑޮލަރު އަލް ނަސްރުން ދިނުމަށް ވަނީ އެއްބަަސްވެފައެވެ.
ރޮނާލްޑޯ ރޭ ނޫސްވެރިންނާ ވާހަކަ ދައްމުންް ބުނީ އަލް ނަސްރުގެ ހުށަހެޅުން އެނާ ގަބޫލް ކުރީ "ކޮންޓްރެކްޓް ޔުނީކް" ކަމުން ކަމަށެވެ. "ކޮންޓްރެކްޓްވެސް ޔުނީކް، އަހަރެންވެސް ޔުނީކް. ޔޫރަޕުގައި އަހަރެން ސާބިތު ކޮށްދޭންޖެހޭ އެއްވެސް ކަމެއް މިހާރަކު ނެތް. ޔޫރަޕުގެ ހުރިހާ ތައްޓެއް އަހަންނަށް ވަނީ ކާމިޔާބު ކުރެވިފައި. ފާޑު ކިޔާ މީހުންނަށް ބުނެލަން އޮތީ މިލީގަކީ (ސައުދީ ލީގް) އާދައިގެ ލީގެކޭ ކިޔައިގެން ދައްކާ ވާހަކައިގެ އެއްވެސް އަސްލެއް ނެތް ކަން" ރޮނާލްޑޯ،37، ބުންޏެވެ.
ރޮނާލްޑޯ މީގެ އިތުރުން ބުނީ އޭނާއަށް ޕޯޗުގަލްއިންނާއި ބްރެޒިލް އަދި އެމެރިކާއިން ހުށަހެޅުންތައް ލިބުނު ކަމަށެވެ.
