އިހަވަންދޫ މަސްވެރިންގެ ގުޅުން (އިމަގު) ޖަމިއްޔާ އަދި އިހަވަންދޫ ޕޮލިސް ސްޓޭޝަން ގުޅިގެން ކުރިޔަށް ގެންދާ "ބުލްބުލް ތެރަޕީ ސެންޓަރ އިމަގު ޣާޒީ ކަޕް 2023" ގައި އިއްޔެ އެންވީކޭ އިން ވަރުގަދަ ޖަންގަލް 5-1 އިން ބަލިކޮށް ފެންވަރު ދައްކާލައިފިއެވެ.
ގައުމީ ޓީމުގެ ތަޖުރިބާކާރު މިޑްފީލްޑަރު ހަމްޒާ މުހައްމަދު (ހަމްޕް) ކުޅެމުން އަންނަ ޖަންގަލްއިން އިންވަނީ ފުރަތަމަ މެޗުގައި އެފްސީ ބޮޑުމަގު 13-1 ގެ ބޮޑު ތަފާތަކުން ބަލިކޮށްފައެވެ.
އެންވީކޭ އާއި ޖަންގަލް އަކީ މިމުބާރާތަށް އެންމެ ބޮޑަށް ތައްޔާރުވި ދެ ޓީމަށް ވެފައި އޮތުމުން، މިމެޗް ފޯރިގަދަވާނެ ކަމަށް މާކުރިންވެސް އޮތީ ޔަގީން ކުރެވިފައެވެ.
މިމެޗްގައި އެންވީކޭއިން ޖެހި 5 ގޯލްގެ ތެރެއިން 2 ގޯލް ކާމިޔާބް ކޮށްދިނީ ޔާމީންއެވެ. ބާކީ 3 ގޯލް ކާމިޔާބުކޮށް ހެޓްރިކް ހެދި އިޝާން އަށްވަނީ މެޗްގެ އެންމެ މޮޅު ކުޅުންތެރިޔާއަށް ހޮވިފައެވެ. ޖަންގަލްގެ ހަމައެކަނި ގޯލް ޖެހީ އެޓީމްގެ ތަހުސީނެވެ.
އެންވީކޭ އަތުން ބަލިވި ނަމަވެސް ޖަންގަލްއަށް ވަނީ މުބާރާތުގެ ދެވަނަ ބުރުން ޖާގަ ލިބިފައެވެ. އެއީ 3 ޕޮއިންޓާއި ފައިދާ 7 ލަނޑާއެކުއެވެ. އެންވީކޭއަށް 3 ޕޮއިންޓާއި ފައިދާ ހަތަރު ލަނޑު އޮތްއިރު، އެޓީމު ދެވަނަ ބުރަށް ނުގޮސް ކަޓާނީ މިއަދު ހަވީރު ބޮޑުމަގާ ދެކޮޅަށް ކުޅޭ މެޗުން 9 ލަނޑަށްވުރެ ބޮޑު ތަފާތަކުން ބޮޑު މަގު އަތުން ބަލިވެއްޖެނަމައެވެ. ބޮޑުމަގު ޓީމަށް ޕޮއިންޓެއް ލިބިފައިނުވާއިރު ގެއްލުން 12 ލަނޑު އެބައޮތެވެ.
