ކޮޕާ ޑެލްރޭ ރައުންޑް އޮފް 32 ގައި ތިންވަނަ ޑިވިޜަނުގެ އިންޓަސިޓީ އަތުން ރޭ 4-3 އިން ބާސެލޯނާ ހަނިގޮތަކަށް މޮޅުވެއްޖެއެވެ.
މެޗުގެ ފުރިހަމަ ވަގުތު ހަމަވިއިރު ދެޓީމު 3-3 އިން އެއްވަރު ވެފައި އޮތުމުން ނަތީޖާ ނެރުމަށް އިތުރަށް ކުޅުނު 15 މިނެޓުގެ ދެހާފުގެ ތެރެއިން ބާސެލޯނާއިން ލީޑް ނެގީ ފުރަތަމަ ހާފުގައި ފޯވާޑް އަންސޫ ފަޓީގެ ލަނޑުންނެވެ. މިމެޗުގައި ބާސާއިން 3 ފަހަރަށް ލީޑް ނެގިއެވެ. އެކަމަކު މިއިން ކޮންމެ ފަހަރަކުވެސް އިންޓަސިޓީއަށް އެއްވަރު ކޮށްދިނީ ބާސާ އެކަޑަމީގެ ކުރީގެ ފޯވާޑް އޮރިއޯލް ސޮލްޑެވިލާއެވެ. އުމުރުން އެންމެ 21 އަހަރުގެ ސޮލްޑެވިލާ ވެފައި ވަނީ ޕީއެސްޖީ އާއި ފްރާންސްގެ ތަރި ކިލިއަން އެމްބައްޕޭއަށްފަހު ބާސާ ކޮޅަށް ހެޓްރިކް ފުރަތަމަ ކުޅުންތެރިޔާއަށެވެ.
މިމެޗުގައި ބާަސާއިން ލީޑް ނެގީ މެޗުގެ ހަތަރުވަނަ މިނެޓުގައި ރޮނާލްޑޯ އަރައުހޯގެ ލަނޑުންނެވެ. ފުރަތަމަ ހާފް ނިމުނީ މިނަތީޖާގައި އޮވެގެންނެވެ. ދެވަނަ ހާފުގައި އިންޓަސިޓީއިން އެއްވަރު ކުރީ 59 ވަނަ މިނެޓުގައެވެ. އެކަމަކު އޭގެ 7 މިނެޓް ފަހުން ދެވަނަ ފަހަރަށް ބާސާއިން ލީޑް ނެގީ އޮސަމާނޭ ޑެމްބެލޭގެ ލަނޑަކުންނެވެ. އިންޓަސިޓީއިން 74 ވަނަ މިނެޓުގައި ލަނޑެއް ޖަހައި އަނެއްކާވެސް ނަތީޖާ ހަމަހަމަ ކުރިއެވެ. ބާސާއިން ތިންވަނަ ފަހަރަށް ލީޑް ނެގީ 77 ވަނަ މިނެޓުގައި ރަފީނާ ކާމިޔާބު ކޮށްދިން ލަނޑުންނެވެ.
މިސީޒަނުގައި ޗެމްޕިއަންސް ލީގް ގްރޫޕް ސްޓޭޖުން ކަޓާފައިވާ ބާސާއަށް ކާމިޔާބު ކުރެވެން އޮތީ ސްޕެނިޝް ލީގާއި ސްޕެނިޝް ކޮޕާ ޑެލްރޭއެވެ.
